“Mahimong mo-eskuyla ka bahin sa driving. Pero puyde man kun ako ray motudlo nimo. Unya mo-apply dayon ka para sa lisensiya. Mobayad lang ta'g fixer aron madali.”
Tuod man, gitun-an gyud ko ni Roger sa pagmaneho sa sakyanan. Sagad adto mi magpraktis sa SRP. Subsob ang akong pagtuon maong dali ra kong nakakat-on. Ni-apply dayon ko’g driver’s license.
Wala mosango ang akong aplikasyon para sa lisensiya tungod sa fixer nga gibayaran ni Roger nga maoy mipalusot sa akong transaksiyon sa buhatan sa LTO. Gihatagan una ko’g temporaryong lisensiya, kanang gitawag og SP. Ang plastik nga lisensiya ayha pa ihatag kun mo-expire na ang akong SP. Pero puyde na kong maka-drive og sakyanan.
Samtang nagpaabot si Roger sa tawag sa ilang agency, naglisod ko sa pagpalusot sa higayon nga si Galen gustong makigkita nako. Bisan unsa lang alibi ang akong himuon aron mosugot si Roger nga molakaw ko nga dili siya kauban. Matag semana, magkita gyud mi si Galen og kausa.
Mosangko gyud mi kanunay sa usa ka mabugnaw’ng lawak. Ug didto among saw-an sa pagtagay ang dugos sa lawasnong kalipay. -- Sumpayan pa