Nalangan nga kabuntagon

Gula 74

Karon pa lang, napaghilantawan na ni Destiny ang posibleng mahitabo sa higayon nga masayod ang ilang mga ginikanan sa ilang tinagoan. Nakaseguro siya nga tulisokon gayod sila sa ilang mga ginikanan. Nasayod siyang dili gayod sila mapasaylo sa ilang mga ginikanan kun mabutyag na ang iyang kahimtang nga nagsabak siya ug si Evan maoy amahan sa bata. Dili kini ang kapalaran nga buot sa ilang mga ginikanan nga modangat kanila.

May lalaki na nga gitagana ang mga ginikanan ni Destiny alang kaniya. May babaye na usab nga gitagana ang ilang mga ginikanan alang kang Evan. Kining nahitabo kanila maoy magpug-ok sa tinguha sa ilang mga ginikanan nga ibuya sila ngadto sa mga binuhat nga maoy napili sa ilang mga ginikanan nga ilang ikauban sa tibuok nilang kinabuhi.

Alang kang Destiny, way bali unta kadto kun napamabdosan siya og laing lalaki basta dili lang ang kaugalingon niyang igsuon. Makauuwaw kaayo ang maong hitabo. Hinuon, wala’y mabasol niining ilang kahimtang karon. Dili ilang kabubut-on ang nahitabo kanila. Aghat sa sungog sa panahon ang nahitabo.

Pero lisod lagi kining ipasabot ngadto sa katilingban nga mayubiton. Bisan unsa pay ilang ipangatarongan, wala’y motuo kanila. Pahamtangan gayod sila nga mga immoral ug amamaliw. -- Sumpayan pa