Ang Impiyerno ni Belen - 2
Gula 98
Nianang pagkabuntag samtang namahaw mi, nagkalingaw mi’g kabildo si Roger. Nakamatikod ko nga mora’g excited na siyang makabalik og trabaho sa barko isip usa ka seaman. Mao nay sentro sa among panagsulti ang mga butang nga may kalabotan sa umaabot niyang pagpanakay og balik sa usa ka international cargo vessel.
“Kun makasakay na ko’g balik,” ni Roger pa, “mas maayo tingalig mokuha ka’g katabang aron dili ka mahago sa mga buluhaton sa balay ug may kauban ka sa pagpuyo dinhi.”
“Wa na kinahanglana ang katabang, Roger,” giingnan ko siya. Makahimo ko sa mga buluhaton sa balay.”
“Pero gusto kong may kauban ka dinhi. Aron ba dili ka ma-bored.”
“Ayaw kabalaka. I can manage.”
Wala na ipamugos ni Roger kanako ang iyang plano pagkuha og katabang. Gitahod niya ang akong desisyon.
“Maayo tingalig magtuon ka’g drive aron makagamit ka sa sakyanan,” mipalain og hilisgotan si Roger.
“Maayo nang ideyaha,” nako pa. “Interesado ko ana. Pero kinsa man ang motudlo nako? Kinahanglan pa bang moeskuyla ko bahin niana?” -- Sumpayan pa
- Latest
- Trending
