Wala itugot sa panahon

Wala’y kadasig si Sandra nga nakig-atubang kang Mike karong gabhiona. Nagmug-ot ang iyang hitsura nga milingkod sa sopa nga atbang sa gilingkoran sa ulitawo. Gipul-an na siya sa nawong ni Mike!

Ambot kun nganong bug-at man gayod ang iyang buot ngadto kang Mike?

"Nganong nia ka man sab?" hatod sa kauga ang iyang pangutana.

"Sama sa naandan," ni Mike pa. "Mamasin na sab ko nga basin niining gabhiona mabati ko na ang tubag nga akong gipaabot bahin sa gugma nga akong gihalad diha kanimo."

"Nag-usik-usik ka lang sa imong panahon, Do, tungod kay kaslonon na kami si Bert."

Milakaw si Mike nga wala manamilit ni Sandra. Samtang si Sandra mahimut-on kaayo nga nagpabiling naglingkod sa sopa. Misalir ang iyang paagi.

Dili tinuod nga kaslonon na sila si Bert ug Sandra. Gilansisan lang sa dalaga si Mike aron dili na kini magsamok kaniya.

Sukad niadto wala gayod mopatim-aw si Mike sa ilang pinuy-anan. Gikalipay kini ni Sandra. Wala na gayo’y magsamok sa pagminahalay nila ni Bert.

Usa ka adlaw niana nanuroy sila si Bert ug Sandra. Ug didto sila mosangko sa usa ka motel. Didto gikutlo ni Bert ang iyang kaputli.

Apan sukad niadtong hitaboa wala na gayud mopakita si Bert kaniya. Nagsusi siya kun unsa nay nahitabo sa lalaki. Nasayran na lang niya nga atua na diay si Bert sa Amerika. May hinigugma diay kini nga Pinay nurse nga atua manarbaho sa California ug kini ang giapas ni Bert.

Kutob na lang si Sandra sa pagpaagas sa iyang mga luha. Nagbasol siya karon nga gihatagan niya’g dakong pagsalig si Bert. Nagmahay siya sa iyang pagtahan sa iyang pagkababaye ngadto niini.

Usa ka hapon niana, wala magdahom si Sandra nga mahitungha si Mike sa ilang pinuy-anan. May talagsaong kalipay nga mialimbukad sa iyang dughan pagkakita niya sa ulitawo. Wala  na si Bert. Busa misantop sa hunahuna ni Sandra nga si Mike maoy iyang ihulip sa kahaw-ang nga gibilin ni Bert.

Giagda niya si Mike sa paglingkod sa sopa sa may sala apan mibalibad kini.

"Ayaw na lang," ni Mike pa. "Nagdali ko. May mahinungdanon lang kong tuyo kanimo."

"Unsa kana?" sukit ni Sandra nga mibati og kahinam.

"Magminyo na ko," laktod nga tubag ni Mike. Dapiton ko unta ikaw sa pagtambong sa akong kasal."

Morag gitamparos og walhon si Sandra sa iyang nadungog. Wala gayod itugot sa panahon nga magkahigugmaay sila si Mike. (Kataposan)