Nalangan nga kabuntagon

Gula 73

“Nasayod kong mobayad kamo bisan pilay akong ibungat,” sa doktora pa. “Kamo gud ang nagkinahanglan sa akong serbisyo. Pero gikasubo ko. Dili ko makahimo pagluib ug pagbulingbuling sa gipanumpaan kong propesyon. Maoy among tahas ang pagluwas og kinabuhi, dili ang pagkutlo niini.”

Nasagmuyo si Destiny sa sinultihan ni Dra. Galas. Iyang natugkad nga wala gayod kini interes nga motabang kanila.

“Gihunahuna unta ninyo kini sa makadaghan sa wala pa kamo magpahinayak sa inyong biga,” daw nagasukmat ang doktora kanila.

Si Destiny ingon sa nahilis sa iyang gilingkoran. Alang kaniya, wala’y kapuslanan ang pagpadayag sa bisan unsa niyang pangatarongan. Mao nga mipili na lang siya sa pagpakahilom.

“Pangita na lang kamo’g lain nga makatabang ninyo,” pintok nga pamulong ni Dra. Galas dayon niining tindog ug misulod sa usa ka private room.

Gumikan sa kapakyas nga ilang naangkon sa ilang pagdangop sa tulo ka mananambal nga ilang gituohan nga makatabang kanila, si Destiny nawad-an na gayod sa hingpit og paglaom. Nagtuo siya nga dili na gayod masulbad ang ilang suliran. Mahitabo gayod ang dakong eskandalo sa ilang pamilya. -- Sumpayan pa