Nalangan nga kabuntagon

Gula 71

Apan wala sila kawad-i og paglaom. Nangita sila’g laing doktor nga ilang gituohan nga makatabang sa dakong suliran nga ilang giatubang. Apan napakyas gihapon sila. Mibalibad ang ikaduhang doktor nga ilang giduol. Giprangkahan sila sa mananambal nga dili kini makahimo sa buot nilang ipabuhat bisan pila pay ilang ibayad ngadto niini.

“Asa na man lang kita niini karon?” Sukit ni Destiny samtang sila nangisnak sa usa ka pabugnawan sa downtown. “Kinsa man kaha ang tukmang tawo nga atong duolon nga makatabang niining atong problema?”

“Ayaw wad-a ang imong paglaom,” alam-alam ni Evan sa manghod. “Di ko mohunong sa pagpangita’g paagi.”

Apan dili na kombinsido si Destiny sa gisulti sa iyang maguwang. Inanay na siyang nawad-an sa paglaom nga makakita pa sila’g tawo nga makatabang kanila pagsulbad sa dakong suliran nga ilang giatubang.

Lakip gani ang ilang pagtuon ila nang napasagdan gumikan sa suliran nga naghasol kanila. Daw multo kini nga naghasol sa tanang higayon sa ilang kinabuhi. Dili ordinaryong suliran ang midangat kanila.

Ang ikatulong giduol nila ni Destiny ug Evan mao si Dra. Erlinda Galas. Ang klinika ni Dra. Galas nahimutang sa usa ka sudlonon nga barangay sa dakbayan sa Talisay. Gipakigkitaan nila ang doktora ug walay lipodlipod nilang gipadayag ngadto niini ang ilang tuyo. -- Sumpayan pa