Nalangan nga kabuntagon

Gula 67

“Kun mao kana, Destiny,” ni Devin pa nga ingon sa nahisagmuyo pag-ayo, “daghang salamat na lang sa kahigayonan nga imong gihatag kanako. Wa ko’y gahom sa pagpugos kanimo aron higugmaon ako. Manghinaot na lang ko nga makaplagan mo ang lalaki nga angay mong higugmaon ug matuod usab nga nahigugma kanimo.”

“Daghang salamat nga nakasabot ka,” matud ni Destiny.

Mitindog si Devin ug mitunol sa binukhad niining tuong kamot ngadto kang Destiny alang sa pakiglamano. Gidawat ni Destiny ang kamot sa ulitawo ug nagpig-itay sila.

“No hard feelings,” ni Destiny pa.

“Yes, no hard feelings,” tubag ni Devin.

Wala madugay, nanamilit na si Devin kang Destiny. Huyhoy ang mga abaga sa ulitawo nga mibiya sa apartment.

Mosulod na unta si Destiny sa iyang lawak sa dihang may nanitsit kaniya. Sa iyang paglingi, si Evan ang iyang nakita. Nagdali kining miduol kaniya.

“Naunsa mong duha kaganina?” Usisa sa maguwang.

“Ngano man diay?” Misumbalik pagpangutana si Destiny.

“Naglamanohay man gud mo? Mora man mo’g mao pay pag-ilaila.”

“Kay naniid ka diay namo?”

“Misil-ip ko sa kilid sa pultahan. Pero wa ko makadungog sa inyong gipanagsultihan. Ngano to?”-- Sumpayan pa