Gula 66
“Nganong mianhi ka pa man?” Gahi ang tingog ni Destiny nga ginuntan sa pagmug-ot sa iyang hitsura. “Di ba gitapos ko na man ang tanan tali kanato?”
“Wa ko pa dawata ang imong pagpakigbuwag nako, Destiny,” nagkanayon si Devin. “Wa ko makakita’g igong hinungdan aron imong putlon ang atong relasyon.”
“Wa ko’y kalipay sa atong relasyon, Devin,” giprangkahan ni Destiny ang ulitawo. “Dili ko komportable.”
“Wa ka ba gyud diay mahigugma nako bisan gamay?” Sukit sa ulitawo.
“Gitun-an ko ang akong kaugalingon sa paghigugma nimo. Gisugot tikaw sa pamasin nga kun magkauyab na ta, ma-develop ang akong pagbati diha nimo. Pero wa gyud, Devin. Mao nga nakahukom kong putlon ang atong relasyon.”
“Lisod ba diay kong higugmaon, Destiny?”
“Ambot lang. Sa imong kabuotan ug kaambongan, nagtuo kong dili ka lisod higugmaon. Pero dili ko usab mapugos ang akong kasingkasing aron mobati og gugma kanimo.”
Wala motubay si Devin sa iyang gisulti. Miduko kini sa iyang atubangan.
“Gikasubo ko, Devin,” ni Destiny pa. “Pero angay lang nga masayod ka sa matuod. Di ko gustong maglaom ka sa wala.” -- Sumpayan pa