Ang Impiyerno ni Belen - 2

Gula 90

Makahimo ka, Belen. Nasayod kong makahimo ka kay anad ka nang mohimo og binuang.”

Mora ko’g natab-okan sa ulahing gisulti ni Galen. Ingon sa usa kini ka tulisok sa akong pagkatawo. Ingon sa gustong ihulagway ni Galen kanako kun unsa akong matanga sa pagka-babaye.

Wala ko makatingog. Ingon sa nainsultohan ko sa gisulti ni Galen.

“Hain ka karon magpuyo uban sa imong ka-live in?” Nangutana si Galen dihang wala ko magtingog.

“Nganong nangutana ka man niana?” Misumbalik ko’g pangutana.

“Gusto kong makatultol.”

“Nabuang ka na ba?”

“Oo. Ug ikaw ang nakaingon nganong nabuang ko.”

Wala ko makatingog. Nasayod ko kun unsay buot ipasabot ni Galen sa iyang gisulti.

Inanay nga milugdang sa akong reyalisasyon nga makabaton ko’g suliran sa pagpuyo namo ni Roger kun dili nako mapasabot og maayo si Galen. Kinahanglang makombinser ko siya nga dili na magsamok nako.

“Kun di ko nimo tug-anan kun hain ka magpuyo, Belen,” ni Galen pa. “Di ko ikaw lung-an.” -- Sumpayan pa