Habak sa lumay nga nabisto

Diriyot matikay-ang si Goyong sa iyang gibarogan kay mao man gayod ang iyang naabtan, nga hilabihan nga nakahawok sa aping ni Noring.

Kaatrason na unta sa agi si Goyong aron manaug sa hagdan sa balay sa maong babaye nga iyang gipaka-Bathala ning ilang balangay sa Pitalo.

"Sobra pa unya ang atong buhaton Masyong sa panahon dili na unya nato kapugngan ang nag-awas-awas tang kahidlaw karong higayona!" ni Noring pa nga nagkanguhal ang tingog.

Wa lang kadto tubaga pa ni Masyong ang kaparaygon sa tingog ni Noring. Sa hunahuna ni Goyong misalir gayod diay ang katingalahang habak sa lumay nga giingon kaniya ni Masyong?

"Kun duha ka katuig og pangulitawo kang Noring ... gumikan ning akong gihabak nga lumay mahimo ko lang nga pasugton si Noring ... sulod lang sa usa ka semana nakong panguyab kaniya!" ni Masyong pa nga nagkayuring ang sinultihan samtang nagkatagbo silang duha sa may simangan nga dalan.

"Sa unsang paagi nga diskarte nga imong himoon Masyong? Hilabihan ra ba gayod katig-a sa kasingkasing nianang Noring?" sagol kanguhal ang tuno sa pangutana ni Goyong.

Wa lang tuyoa ... may mipasunding sa may ngilit sa panumdoman ni Goyong kun giunsa siya og rematsi sa pagbalibad ni Noring samtang adlaw-adlaw siya mamisita sa maong babaye nga nakapapitik sa katim-os sa iyang dalisay nga gugma.

"Bisan pa tingali Goyong ... kun ikaw na lang ang mahitabo nga mahabilin nga buhi nga lalaki dinhi sa ibabaw sa kalibutan dili ug dili gayod ako mahigugma kanimo!" pintok nga gidaygan siya ni Noring.

"Tana dayon sa sulod sa sibay Noring ... kay sugdan ta na ang kombate nga way tihiktihik!" kalit lang nahagtos ang kahalawom sa paghanduraw ni Goyong nga nakabati sa tingog ni Masyong nga daw hangyo lobo nga mibitad kang Noring.

"Sa dili pa kita manulod sa sibay ... Masyong ipagawas una kanang gihabak mong linikit sa imong hawak?" ni Noring pa nga maoy nangunay og kuha sa daw puntil nga salapi ni Masyong.

Diriyot mataktak ang kalimutaw ni Goyong nga nagtan-aw sa tuy-od kaayo nga papel de banko nga gidunol niya kang Noring.

Pagkaugma ... mao na lamang ang nabatyagan ni Goyong nga minghoy kaayo ang bayhon sa nawong ni Masyong kay kadtong salapi nga gihatag niya kang Noring halin diay kadto sa iyang kabaw nga igdadaro. (Kataposan)