Ang Impiyerno ni Belen - 2

Gula 87

Nakahunahuna kong maglulinghayaw sa siyudad. Maong miadto ko sa dakbayan sa Sugbu. Nag-window shopping sa sikat nga mga mall. Gikan sa Robinsons, miadto ko sa Ayala. Gikan didto, mipatinghulog ko ngadto sa SM. Milahos pa gyud ko sa Park Mall. Ug misangko gyud ko ngadto sa Makro. Nakahunahuna kong magpa-member sa maong tindahan.

Hapon na sa paggawas nako sa Makro. Pero wala pa ko’y planong mopauli sa balay. Gusto kong gabii nang mahiabot sa Talisay aron dili ko ma-boring pag-ayo. Nagpahatod ko’g taxi ngadto sa Colon. Didto, misulod ko sa usa ka outlet sa Chowking ug nanihapon.

Human makapanihapon, gisid-ing ko ang relo sa akong bukton. Alas siyete kinse ang oras. Sayo pang ipauli. Migawas ko sa kan-anan ug milabang sa karsada. Misulod ko sa Metro Gaisano.

Milahos ko sa school and office supplies department. Namili ko’g pocketbooks sa mga nobela. Nakapili dayon ko. Mga nobelang pocketbooks nga pulos sinulat ni Uriel Cruz Vallecera ang napilian nakong paliton.

Gidala dayon kini nako sa counter ug gibayran.

Human kabayri ang gipalit nga pocketbooks, nanaog ko agi sa escalator. Paghimuntog nako sa ladies department, midiretso ko sa sapatosan. Nagsukodsukod sa new arrival nga mga sapatos. Wala ko’y planong mopalit pero kun duna gyud koy magustohan, tingalig matental ko sa pagpalit niini. Total, may igo man kong cash nga dala. -- Sumpayan pa