Ang Impiyerno ni Belen - 2

 Gula 86

Si Roger ingon sa nakasabot nga nalain na ang akong sinultihan. Wala na siya manguti-kuti. Mora’g dili siya buot nga mahatod sa lantugi ang among panagsulti.

Usa ka gabii niana, human sa mainiton namong lovemaking session, may gisulti si Roger nako.

“Moadto ko sa Manila sa sunod semana,” giingnan ko niya.

“Mag-unsa ka didto?” Gipangutana ko siya.

“Moadto ko sa among agency. Mag-follow up ko kun kanus-a ko makapanakay og balik sa barko.”

“Magdugay ka ba didto?”

“Labing dali ang usa ka semana.”

Pagkasunod semana, nahinayon gayod ang paglarga ni Roger paingon sa Manila. Gibati ko ang tumang kalaay sa pag-inusara sa balay.

Gihimo ko ang tanang paagi aron mapukan ang kalaay sa pag-inusara sa balay. Tan-aw og DVD. Maminaw og musika. Mag-chat sa internet. Pagpakig-binayloay og text messages ni Roger samtang didto siya sa Manila.

Sa sinugdan, misalir ang maong paagi. Pero sa kadugayan, wala nay epekto nako ang maong diversion. Dili na ko malingaw. Gipul-an ko. Ug ang kalaay nga akong gibati mora’g makamatay. -- Sumpayan pa