Ang gugma sa bulingit

Istong bulingit! Istong bulingit!" Daw hait nga punyal ang singgit ni Liling nga misamad sa akong kasingkasing. Apan wala ko kini ikasuko. Hinuon, gipahiyoman ko siya. Gidawat ko ang iyang pagtawag nako’g bulingit kay mao man usab kini ang matuod.

Magkabulingit gyod sa taya ug uban pang hugaw sa barko ang gisul-ob kong sapot matag pauli ko gikan sa baradero nga akong gitrabahoan. Distansiya lamang og diyotay ang gitrabahoan kong baradero ug ang among balay busa dili nalang ko mag-ilis og magsul-ob og panglakaw nga sinina inig pauli nako. Maoy hinungdan nga gitawag ko ni Liling og bulingit.

Si Liling usa ka dalaga nga anak sa magtiayong Binog ug Mayling nga amo da usab nga silingan. Matag labay ko sa ilang tindahan, kay agianan man kini paingon sa among balay, madungog ko gayud ang tingog ni Liling nga mohingalan kanako og bulingit. May panahon usab nga sa akong paglingi makita ko ang iyang nawong nga mogimaw sa rehas sa ilang tindahan.

Nagpangedaron na ko’g napulog siyam. Nagtrabaho ko sa baradero kun ayohanan sa barko nga nahimutang sa haduol nga pantalan isip tigtiktik sa taya. Tangtangon namo ang taya sa lawas sa barko ug hulipan kini og bag-o nga puthaw. Usahay maasayin ko sa panghaw sa barko ug dili gayud kalikayan nga mabulit sa anuos ang tibuok kalawasan. Apan kining tanan gidawat ko tungod sa akong pangandoy nga kauswagan sa kinabuhi. Dili babag alang kanako ang kakabus aron makab-ot ang kahamugaway. Naningkamot ko sa pagtrabaho sa adlaw ug mieskuyla ko sa gabii.

"Tingalig naibog nimo kana si Liling, Bay Istong?" Pulong sa akong higala ug kauban sa trabaho nga si Willie dihang nagkaabot na usab kami sa karenderiya. Atol kadto sa among break sa paniudto. "Panguyabi kuno siya’g suway, Bay!"

Nahilom ko tapos mabati ang sugyot ni Bay Willie. Unya kalit nga mihulma sa akong hunahuna ang panagway ni Liling. Maanyag si Liling ug buotan. Gani, anaa lamang siya sa tindahan sa panahon sa adlaw kay gabii man usab ang iyang klase. Nurse ang gikuha niyang kurso. Ug dili ko mahimong limdan ang akong kaugalingon-hilom ko siyang gihigugma!

Usa ka gabii niana ug wala’y klase, miduol ko sa tindahan ni Noy Binog nga dili na bulingit. Porma na kong ulitawo. Gipasinaw ko sa gel ang akong buhok samtang nangalimyon usab sa kahumot ang polo nga akong gisul-ob. Unya gihangyo ko si Liling sa paggawas sa tindahan. Ug sa wala’y paglangan, gidigahan ko dayon siya sa akong gibati.

"Ang tinuod, Ernesto, dugay na sab kong may gusto nimo!" ni Liling pa sa pulong nga daw yelo kabugnaw, "Bulingit ka apan limpiyo kang pagka tawo ug may pangandoy sa kinabuhi. I love you, too!"

Nakaambak ko sa tumang kalipay human madungog ang mga pulong ni Liling. Ug sa akong alimpatakan mibusilak ang kahayag sa kausaban. Ugma damlag, sa ako na unyang paglampos sa kurso pagka enhinyero, mapulihan na unya ang bulingit kong sinina sa luho nga sapot kay duna na man ko’y lamdaman sa akong pagpaningkamot. (Kataposan)