Nalangan nga kabuntagon

Gula 59

Nakaingon si Destiny sa hilom nga nag-usab na gayod diay ang iyang maguwang. Wala na kini mahingag sa mga babaye. Gibarogan gayod sa iyang maguwang ang gisulti niini kaniya nga dili na kini magduwa-duwa sa mga babaye.

Apan dili diay kay si Destiny ray naniid kang Evan. Lakip si Evan naniid usab kaniya. Kay nakamatikod man kini nga taudtaod nang wala mopakita si Devin sa apartment nga ilang gipuy-an. Mga duha na tingali ka semana sa banabana ni Destiny.

“Nag-away mo?” Pakisayod ni Evan.

“Sobra pa’s away, Kuya,” tubag ni Destiny.

“Unsay buot mong ipasabot?”

“Nag-break na mi.”

“Kadali gud?”

“Unsay dugayan? Di ko malipayon sa among relasyon, uy. Wa gyu’y lami! Tungod tingali kay...”

“Kay unsa?”

“Tungod tingali kay wa man gyud ko mahigugma niya.”

“D-Destiny...?”

“Gisugot ko lang siya aron pang-experience. Namasin sab ko nga makakat-on ko paghigugma niya kun uyab na mi. Pero wa man gyud. Dili diay igo ang kabuotan sa usa ka lalaki aron higugmaon siya sa babaye. Kay wa man gyud ko mobati’g paghigugma kang Devin bisan sa kabuotan nga iyang gipakita ngari nako. Wa gyud mo-prosper ang among relasyon. Maong nakigbuwag na lang ko niya tungod kay sama ra sa gisilotan nako ang akong kaugalingon kun padayon kong makigrelasyon sa tawo nga wa nako higugmaa.” -- Sumpayan pa