Ang Impiyerno ni Belen - 2

Gula 82

“Belen, nganong imo man kining gibuhat? Nganong kalit ka man lang kaayong mibiya sa ato ug nagpalayo nako?”

“Maglisod ko sa pagpasabot nimo, Galen, sa nakab-ot kong desisyon. Hangyoon ko lang ka nga kun mahimo ayaw na ko’g samoka.”

“Mikuyog ka ba og lalaki, Belen?”

Wala ko motingog. Mora’g nanagat lang sa pagpangutana si Galen. Bunga lang kini sa iyang pangagpas.

Tubaga ko, Belen,” ni Galen pa didto sa pikas tumoy sa linya. “Lalaki ba ang hinungdan sa kalit mong pagbiya sa atong lungsod?”

“Oo,” mubo kong tubag.

“K-kun mao kana, may gipuli ka na diay nako sa akong dapit sa imong kasingkasing?”

“I’m sorry, Galen. But love is insipid this time.”

Wala makatingog si Galen.

“Ayaw na ko’g samoka, Galen,” giingnan ko siya. “Total, di ka na man alkanse sa atong relasyon. Naangkon mo na ang akong pagka-babaye sa makadaghang higayon.”

Aron dili na makapanawag si Galen nako, giilisan dayon nako ang akong SIM. Dili ko gustong magsamok siya nako ... kanamo ni Roger. -- Sumpayan pa