'Saka una diri, Dong'

Bisperas pa sa piyesta nga miadto sila si Dodong ug Marcial didto sa Balangay Hilan. Ang maong balangay atua mahimutang sa bukirang dapit sa lungsod o poblasyon Tahirig.

Maoy tuyo sa duha ka managhigala (Dodong ug Marcial) ang pagduaw ni Noy Nanong, magulang ni Marcial.

"Kumusta man mo, Dong Cial?" malipayong miabiabi si Noy Nanong sa duha.

"Aw, maayo man gihapon sa grasya sa Diyos" tigson ang tubag sa gipangutana uban sa mainitong paglamanohay nila.

Unya gianinaw nila ni Marical ug Dodong ang tibuok kalikupan. Nasabak sa ilang panan-aw ang nagkadaiyang mga tanom. Usab, nakita nila ang lainlaing hayopan duol sa balay ni Noy Nanong.

Mipakgang dayon ang tagbalay sa pag-ingon: "Udto na ra ba kaayo ... mangaon na ta. Duna koy pagkaon nga giandam para ninyo."

Human sa ilang paniudto, mitiing o miipis dayon si Noy Nanong sa bahal nga tuba gikan sa sugong.

Pagkahurot sa tuba nga ilang giinom, nanlakaw sila didto sa unahan diin didto ang suking tindahan ni Noy Nanong nga maoy palitanan niya sa ilang mga gikinahanglan (sama sa kamay, asin, gas, posporo ug ubang kagamitan nila).

Didto sa maong tindahan mipadayon sila sa ilang pag-inom sa ilimnon nga makahubog.

Hapit na motungang gabii nga miundang sila. Grabe kaayo ang ilang kahubog. Gani, nagdulog na sila sa kaugalingon nilang sinuka!

Unya, maoy naamgohan ni Dodong nga kadtong naninda didto sa may hawan ilawom sa kalubihan, nanghipos na. Namauli na sila. Sanglit ngitngit kaayo, nagsulo sila sa langkay sa lubi.

Niadtong tungora, gihuwasan na si Dodong sa kahubog. Midali siya pagbangon ug misiyagit... "Huwata ko ninnnyoooo!"

Tungod sa kahadlok, misutoy og dagan ang gigukod ni Dodong. Dali ra silang nahanaw.

Misuotsuot si Dodong sa lawod sa kamaisan nga namanay na. Didto siya mosangko sa utlanan sa naasoy'ng kamaisan. Atbang niini mao ang usa ka payag.

May tigulang babaye nga naglingkod sa lantay sa pantawan niini. Misangpit ang tigulang ngadto ni Dodong: "Saka una diri Dong...", apan wala mosanong si Dodong.

Nianang pagkabuntag, giistorya ni Dodong ngadto ni Noy Nanong ang nahitabo niya.

"Maayo kay wa ka mosaka sa payag."

"Kay ngano man, Noy?" miusisa si Dodong.

"Segurado gyung balbalon ka niadtong tigulang babaye kay mangtas nga ungo kadto siya!" (kataposan)