Nalangan nga kabuntagon

Gula 57

“Nakit-an ko kamo si Evan nga nanuroy sa Colon,” tubag sa lalaki. “Nagsakay ko niadtong taxi. Wa na lang ko mokanaog kay nagdali ko. Gisugat nako ang akong Auntie sa airport.”

Wala motubay si Destiny sa ulahing gisulti ni Devin.

Sa hilom, nabatyagan ni Destiny nga dili siya komportableng makigsulti ni Devin karong managtrato na sila. Wala siya makasabot sa iyang kaugalingon. Mora ba’g bation niya ang kalaay kun si Devin ang iyang kauban ug ikasulti. Lahi sa iyang pagabation kun si Evan ang iyang ikasulti.

Bisan unsa na lang ang gisugilon ni Devin kaniya apan wala gayod siya malingaw. Hangtod nga nanamilit na ang ulitawo dihang nag-anam na’g kalawom ang kagabhion.

Taudtaod nang nakalakaw si Devin. Sulod sa iyang lawak, naghayang si Destiny nga naghigda sa mahunolhunol nga kama. Nagpitawpitaw ang iyang mga mata nga mitutok sa kisame.

Nabatyagan niya nga dili siya malipayon sa relasyon nila ni Devin. Buotan ang lalaki ngadto kaniya apan dili kini igo aron paghatag kaniya’g kalipay. Mora’g may haw-ang ang ilang relasyon.

Sumala sa nadunggan niyang mga sulti-sulti, nindot kuno ang feeling kun makabaton og boyfriend ang usa ka babaye. Apan wala kini mapamatud-i sa pagpakigrelasyon niya kang Devin. Dili siya komportable. Dili siya malipayon. Wala siya masayod kun unsay hinungdan kun nganong naingon siya niini. -- Sumpayan pa