Nalangan nga kabuntagon

Gula 55

Apan karon namatikdan ni Destiny ang dakong kausaban ni Evan. Sila na ang kanunay mag-uban sa pagpanuroy. Sukad sa ilang pagbalik sa siyudad gikan sa ilang lungsod sa Pinamungajan, wala na usab si Evan magdala og babaye sa apartment nga ilang gipuy-an. Kini nakapasamot sa kahibulong ni Destiny.

“Wa na lagi nimo dad-a si Alexa sa atong gipuy-an, Kuya?” Gipangutana ni Destiny si Evan usa ka higayon niana nga nangaon sila sa Sunburst sa dalan Legaspi.

“Wa na si Alexa,” mubong tubag sa maguwang.

“Unsay wa na?” Buot klarohon ni Destiny ang gisulti ni Evan.

“Nag-break na mi,” patin-aw ni Evan.

“Kanus-a lang?”

“Dili pa dugay.”

“Kay nagkita na diay mo?”

“Wala. Nag-break mi pinaagi sa text. High tech na gud ta ron.”

“Unsa may hinungdan sa inyong panagbulag? Tungod ba ni kay minyoonon ka na kang Allison?”

“Dili, uy. Way labot si Allison sa panagbulag namo ni Alexa.”

“Kun mao, unsa man diay ang hinungdan?”

“Nakahukom na kong magseryoso sa akong kinabuhi.”

“Unsay buot mong ipasabot?” -- Sumpayan pa