Nalangan nga kabuntagon

Human sa pangaon, nagkasabot sila nga manan-aw og sine. Pelikulang Iningles ang ilang gitan-aw. Maoy bida sa maong pelikula si Angelina Jolie, ang paboritong artista sa Hollywood ni Destiny.

Tungod sa kabugnaw sa sulod sa sinehan, mikurog sa katugnaw si Destiny. Midip-ig siya kang Evan aron mahupay og diyotay ang gibati niyang katugnaw.

Gitapos gayod nila ang last full show una sila nanggawas sa sinehan.

Nahuman ang enrollment sa second semester. Samtang nagpaabot sa adlaw sa pagbukas sa klase, sila si Destiny ug Evan kanunay manuroy. Laay man gud kun kanunay lang silang magpondo sa apartment nga ilang gipuy-an. Mao nga hapit kada adlaw silang mag-malling.

Gipahimuslan nila ang panahon samtang wala pa magsugod ang klase. Kun tingklase na, wala na unya sila'y panahon sa pagpanuroy. Ang ilang panahon matingob na unya sa pagtuon tungod sa kadaghan sa mga libro nga ilang tun-anan.

Si Destiny na ang kanunay ikuyog ni Evan sa pagpanuroy. Sa hilom mibati'g kahibulong ang dalaga kay kaniadto, hapit man kini dili mosugot nga mokuyog siya kun may lakton kini. Kun dili lang siya mamugos, dili gayod kini pakuyog. Nakasabot siya kun ngano. Uyab ni Evan ang kuyog niini sa pagpanuroy. -- Sumpayan pa