Nalangan nga kabuntagon

Gula 52

Wala na makabalibad si Evan sa iyang pagpamugos.

Miadto sila sa SM City Cebu. Samtang sila nanglakaw sulod sa maong mall, migunit si Destiny sa bukton ni Evan.

“Partner,” gisangpit si Evan sa usa ka tulo ka lalaki nga ilang gikasugat sulod sa SM. “Lain na man sab lagi ning imong kuyog?”

“Bag-o na sab diay ka’g tisks, Partner,” matud sa kauban sa maong lalaki.

“Ayaw mo’g tinonto, uy,” ni Evan pa. “Manghod ni nako.”

Ug nagsaylo sila.

“Kinsa man to sila?” Nangutana si Destiny dihang layo na ang tulo ka lalaki kanila. Milingi siya kanila.

“Akong mga klasmet,” tubag ni Evan.

“Ilado gyud ka kaayo sa imong pagka-palikero, da. Lakip ako nasaypan nga bag-o na sab nimong girlfriend.”

“Kaniadto ra to, uy. Magtinarong na ko ron. Di na ko magbinuang og babaye.”

“Kaha?”

“Oo, lagi. Kay motuo na ko’g gaba.”

“G-gaba?”

“Oo. Di ba ikaw ra may nag-ingon nga tingali’g higabaan ko sa mga babaye nga akong giduwa-duwaan? Karon gigabaan na gyud tingali ko.”

“Nganong nakasulti ka man niana?” -- Sumpayan pa