Ang Impiyerno ni Belen - 2

Gula 74

Very tempting ang gitanyag ni Roger. Pero naglisod ko paghukom kay dili pa ko andam magminyo pag-usab. Kontento ko sa akong kinabuhi nga bisan wala’y bana apan dili uhaw sa lawasnong kalipay kay naa man sila si Galen ug Roger nga mopuno sa akong panginahanglan. Nganong magminyo pa man?

Kun sexual pleasure ray tinguhaon, dili na kinahanglang magminyo ko pag-usab. Matilawan ko ang maong kalipay bisan wala pa ko’y bana. Nasayod kong daghang mga lalaki ang interesado nako.

Hinuon, nagtuo ko nga adunay laing hinungdan -- gawas sa sex -- ngano nga magminyo gyud ang tawo. Kini ang nasuta kong hinungdan nganong gusto gyud ni Roger nga magpakasal na kami.

Apan ang kaminyoon usa ka life-long commitment. Sa paghunahuna pa lang niini, mora’g dako na kining responsibilidad para nako. Maong naglisod ko paghukom sa gisulti ni Roger kanako.

“Mosugot ka ba, Belen, sa akong gi-propose?” Misukna si Roger taliwala sa akong kahilom.

“Di pa ko makatubag nimo sa pagkakaron,” giingnan ko si Roger. “Ako pa ning timbang-timbangon.”

Wala mamugos si Roger. Gihatagan ko niya’g panahon sa paghunahuna sa iyang gisulti nako. Maong gilain na namo ang tema sa among hilisgotan. -- Sumpayan pa