Nalangan nga kabuntagon

“Nakigsabot nila ni Daddy ug Mommy.”

“Bahin sa unsa?”

“Sa kaminyoon namo ni Allison.”

“U-unsa?”

“Dili una mobalik si Allison sa Amerika. Huwaton na lang niya nga mahuman ang second semester nako sa Marso aron magpakasal na kami.”

Wala makatingog si Destiny. Nakugang siya sa kasayoran nga gibutyag ni Evan kaniya.

Mibatig tumang kahingawa si Destiny sa iyang igsuon. Ipakasal na gayod diay si Evan sa iyang mga ginikanan ngadto kang Allison. Dili na gayod diay mapugngan ang pagbuya sa iyang maguwang ngadto sa anak sa ilang kasosyo sa negosyo. Nabalaka pag-ayo si Destiny.

“Dako tuod kanang problema, Kuya,” ni Destiny pa. “Unsa may imong plano karon? Magpakasal ka na lang gyud kang Allison?”

“Dili, Destiny,” ni Evan. “Dili ko magpakasal sa maong babaye.”

“Nan, unya? Supakon nimo ang kagustohan nila ni Daddy ug Mommy.” Wala motingog si Evan. Miduko kini sa atubangan ni Destiny. Ingon sa lawom kaayo ang gihunahuna.

“Hain man kahay maayo, Kuya,” ni Destiny pa, “nga sultihan mo na lang sila si Daddy ug Mommy nga wa kay gusto nga si Allison ang mahimo nimong asawa?” -- Sumpayan pa