Nalangan nga kabuntagon

Gula 48

Diha na mogawas si Destiny sa iyang lawak sa nakalakaw na sila si Allison ug mga ginikanan niini. Miadto siya sa kosina kay mihilab ang tiyan sa kagutom. Wala pa man gud siya makapanihapon. Giantos lang niya ang kagutom basta dili lang niya makita si Allison.

Mikaon siya. Ingon sa wala na siya ganahi sa nalangan nga panihapon. Mikaon lang siya’g diyotay aron kasudlan ang iyang tiyan.

Pagbalik niya ngadto sa iyang lawak, napahunong siya sa paghitungod niya sa lawak ni Evan. Nagsiga pa ang suga sa sulod niini. Milingi siya ngadto sa lawak sa iyang mga ginikanan. Nagmingaw na. Misantop sa iyang hunahuna nga nangatulog na tingali ang iyang mga ginikanan.

Misulay siya’g panuktok sa pultahan sa lawak ni Evan. Nakaseguro siyang nagmata pa kini kay nagsiga pa man ang suga sulod sa lawak niini. Tuod, wala siya masayop. Wala madugay sa iyang pagpanuktok, giablihan ni Evan ang pultahan. Misulod dayon siya. Giserad-an ni Evan ang pultahan.

Namatikdan ni Destiny nga milabhag ang kasubo sa panagway ni Evan samtang nagtupad sila paglingkod sa ngilit sa kama niini.

“Anything wrong?” Gisukit ni Destiny ang maguwang.

“Yes,” mubong tubag ni Evan dayong buhi og lawom nga panghupaw.

“Unsa man diay gianhi ni Allison ug sa iyang mga ginikanan? -- Sumpayan pa