Nalangan nga kabuntagon

Gula 43

“Kamo ang mag-igo,” sa amahan pa. “Pero sa dili pa kamo mamalik ngadto sa siyudad, mas maayo tingali nga bisitahan mo una si Allison. Ania man siya sa ato. Mibakasyon siya uban sa iyang mga ginikanan nga atua na magbase sa Amerika. Nagsusi usab sila sa gisosyohan namong negosyo.”

Wala motingog si Evan.

Gipasiplatan lang ni Destiny ang maguwang. Dihang nagkatagbo ang ilang mga tinan-awan, iya kining gikidhatan. Gusto niya nga dili sanungon ni Evan ang sugyot sa ilang amahan. Dili siya gustong makigkita si Evan kang Allison.

“Bisitahi una si Allison, Evan,” gikan ni Mrs. Virginie Galasi. “Mas maayong magkakita kamo sa dili pa siya mobalik ngadto sa Amerika.”

“Bitaw, Hijo,” dason ni Mr. Galasi. “Aron ba sab magkasandurot mo’g maayo. Kay tingali, sa sunod nga pagpauli ni Allison dinhi sa Pilipinas, makatapos ka na usab sa imong pagtuon. Ug mahimo na kamong magpakasal.”

Misanting ang mga dalunggan ni Destiny sa iyang nadungog. Dili siya mosugot nga magpakasal si Evan ngadto kang Allison, ang babaye nga maoy gibuya sa ilang mga ginikanan alang niini. Wala siya makagusto sa maong babaye alang sa iyang maguwang. -- Sumpayan pa