Ang Pasko ni Piolo, ang Pasko ni Pascual

Malipayon si Piolo Montecillo nga nagmaneho sa iyang Toyota Altis padulong sa iyang bach-elors pad sa may Lemontz Subdv., Talisay City. Gikan pa siya nga nag-attend og Christmas party sa ilang kompaniya nga didto gi-held sa Waterfront Hotel.

Atol sa maong party gihatag ang ilang Christmas bonus. Nagbaguod usab ang mga empleyado sa mga Christmas giveaways sama sa hamon, grocery packs, ubp. Nisamot ang kalipay ni Piolo dihang taliwala sa maong party nadawat niini ang plaque of appreciation isip most outstanding branch manager sa Sureway Lending nga dunay kinse ka branches dinhi sa Metro Cebu.

Gipangunayan gayud kini og tunol sa ilang chairman of the board nga si Mr. Cirilo Ermacos. Na-hit nila ang income nga gi-target, maong gihatagan sila sa kompaniya og makabungog nga Christmas party. Salamat sa ilang microfinance program. Samtang diha na siya haduol sa may Mananga Bridge. Nadapit ang iyang pagtagad sa paskohanong awit gikan sa iyang car stereo ang "Miss kita kung Christmas" ug mao dayo'y nipasunding sa iyang handurawan si Valerie, ang iyang girlfriend, usa ka nurse nga tua karon nag-base sa Canada.

Nagplano ang duha nga magpakasal na ini'g expire na sa contract sa dalaga. Nakapahiyum ug mapasalamaton si Piolo sa Kahitas-an sa mga grasya nga nadawat, sa maayong lakaw sa iyang career ug sa iyang lovelife. Pero bisan pa niini, dili kay tungod tua sa Canada si Valerie ug tua sa Cagayan ang iyang mga ginikanan og igsuon, mora gihapon og duna siya'y kahaw-ang nga gibati nga dili niya matugkad kun unsa, mora og dili kompleto ang iyang kalipay karong paskoha.

Kalit nga naputol ang paghanduraw ni Piolo dihang kalit lang may nilabang nga bata. Dihadiha ni-apply dayon siya og brake ug maoy iyang nakita ang bata nga nalamba didto sa daplin sa kalsada.

Wala siya makaseguro kun naigo ba gayud kini sa iyang sakyanan. Ang iyang gibati nga kalipay kalit nga gipulihan og tuman nga kakulba. Iyang gilugar ang iyang kotse ug iyang giduol ang bata nga sa iyang banabana mga diyes anyos pa.

Nakabarog na kini ug naghilak. Giayo pagtan-aw ni Piolo kun wala bay bun-og ang maong bata. Matud sa bata wala kuno siya maigo sa kotse nalamba lang siya tungod sa kalit niyang paglikay niini nga maoy nakapa-outbalance niya.

Puwerteng tiyabaw sa bata nga nagtudlo sa pinalit nga pancit nga karon nagpasad na sa kalsada. Nasayran ni Piolo nga usa diay ka basurero ang bata nga ginganlan og si Pascual.

Gikuha ni Piolo ang mga giveaways diha sulod sa iyang kotse ug gikuyugan ang bata nga si Pascual ngadto sa ilang barongbarong ubos sa tulay.

"Mao man god ang nabatasan niining akong anak Sir Piolo nga kun dakudako ang iyang kita sa pagpamasura nga magdala gayud kini og pansit para namo sa iyang manghud nga si Butsoy," matud sa hubakon nga inahan ni Pascual nga si Nang Sebastiana.

"Ayaw mo kaguol dong Pascual sa imong pansit nga nayabo didto sa kalsada. Akong ihatag isip akong pinaskohan ninyo kining akong nadawat gikan sa among Christmas party kining hamon ug mga grocery packs," matud ni Piolo. Gitunolan usab og duha ka libo ka pesos ni Piolo ang inahan ni Pascual para mapa-check up ang hubak niini. Mapasalamaton ug hilabihang lipaya ni Pascual maingon man sa inahan ug sa manghud niini sa pinaskohang ilang nadawat.

Gikan sa buslot sa atop sa barongbarong nila ni Pascual, nalantaw ni Piolo ang mga bitoon didto sa kalangitan ug sa iyang tan-aw nisamot kini ka mabolukon. Mora kini og mga series lights nga gidayandayan sa kalangitan. Paggawas niya sa barongbarong iyang nasugat ang bugnaw nga huros sa hangin nga dala karong panahon sa Pasko, gibati niya ang kaluag sa dughan ug ang tuman nga kalipay. (Katapusan)