Nalangan nga kabuntagon

Gula 36

Nakahukom sila si Destiny ug Evan nga dili motaho ngadto sa mga awtoridad bahin sa nahitabo. Nagtuo silang lisod dakpon kadtong mga adik nga nakasakay sa bus nga ilang gisakyan. Gawas pa, kun ma-blotter sa buhatan sa kapolisan ang nahitabo, magmugna lang kini’g eskandalo sa ilang pamilya. Masayran na unya hinuon sa publiko ang nahitabo kanila.

Maong nakahukom silang ililong ang tanan.

Hapon nang nahiabot sila si Destiny ug Evan sa Pinamungajan. Wala silay tingogay. Sa paghiabot nila sa balay, si Destiny misulod dayon sa iyang lawak. Mao usab si Evan. Igo lang silang miamen sa ilang mga ginikanan ug misulod dayon sa tagsatagsa nila ka mga lawak.

Hangtod sa ilang pagpanihapon, wala magtinagdanay sila si Destiny ug Evan. May mga higayon nga magkatagbo ang ilang tinan-awan. Si Evan ang unang molingiw. Nahimuot sa hilom si Destiny sa iyang maguwang.

“Naunsa ba mong duha?” Sukit ni Mr. Sebastian Galasi nga nakamatikod sa katingad-an nilang mga lihok. “Ngano bang wa man mo’y tingogay?”

“Bitaw, da,” matud pa usab ni Mrs. Virginie Galasi. “Kaganina ra ko’ng nakamatikod sukad sa inyong pag-abot nga wa mo magtagdanay. Unsa bay nahitabo ninyo? Nag-away mo?”

“W-wa man, Dad, Mom,” si Destiny ang mitubag. “Gikapoy lang mi sa biyahe.”

Wala na mangutikuti ang ilang mga ginikanan. -- Sumpayan pa