Nabuhi sa solisitasyon

Ang kawad-on sa tawo daghan og sangpotan. Mahimo nga tungod niini mosaka ang kremin. Mahimo usab nga tungod niini mosamot ang paningkamot sa tawo   aron nga mabuhi. Usa sa nakasinati sa mapait nga bunga sa kawad-on mao si Nestor, 59, ug lumolupyo sa San Fernando, Masbate.

Gumikan sa tumang kawad-on si Nestor igo ra gayod nga nakatapos sa elementarya. Tungod sa kakulang sa kaalam nga iyang nahuptan milangyaw siya sa lainlaing dapit sa nasud aron manarbaho. Ang una niyang trabaho mao ang pagka-boy sa usa ka gasoline station.

Sa iyang tulo ka tuig nga pagpa-boy sa gasoline station iyang nahigala ang usa ka tawo nga gihinganlan lamang og Frank. Si Frank maoy hari-hari sa pag-solicit atol sa mga piyesta sa barangay. Aron modako gayod ang iyang kita nagtukod siya og pundok sa mga entertainers aron makapasundayag og usa ka variety show sa matag piyesta sa barangay.

Usa niana ka adlaw si Nestor gihangyo ni Frank sa pagtabang kaniya sa pag-solicit sa barangay piyesta sa Sumagwan, Argao pahinungod sa iyang balaan nga patron nga si San Agustin de Padua. Tuod man si Nestor dako kaayo og nasapi sa iyang pag-solicit kay ang 50 ka sobre nga gihatag kaniya ni Frank nahurot man gayod.

Napulo ka libo ang bahin ni Nestor sa iya lamang usa ka semana nga pag-solicit. Samtang ang iyang bulan sa gasoline station dos mil pesos lamang.

Gumikan sa iyang paghigmata sa kamatuoran nga gipahimuslan lang diay ang iyang kusog sa iyang agalon, miundang siya og trabaho ug mi-concentrate sa solicitation.

Ang lainlaing mga solicitation nga gisalmotan ni Nestor naglangkob sa mga barangay piyesta, Christmas greetings, Siete Palabras, magazine, newspaper ug mga boxing promotions. Gumikan sa solicitation si Nestor naabot sa Parañaque, Ormoc, Surigao, Davao ug uban pa. Hapit na mo 40 ka tuig ang iyang pag-solicit.

Kining pangitaa ang iyang gibuhi ug gipaeskuyla niya sa iyang mga anak. Gumikan niini, nakapamalit usab siya og mga appliances ug mga ilimnon alang sa iyang paglingawlingaw.

"Bahala na og tamayon ko sa mga tawo nga nabuhi lang sa pagpakilimos basta dili lang ko mangawat," matud pa ni Nestor ngadto sa iyang higala nga si Jeoffrey.

Si Benjamin Franklin mipahinumdom kanato. "Poverty often deprives a man of all spirit and virtue: it is hard for an empty bag to stand upright." (Kataposan)