Gula 30
Wala maggunok si Evan. Si Destiny nagpabilin nga nagpakaaron-ingnon nga natulog nga nagsandig sa dughan sa maguwang.
Napikal tingali ang adik nga wala motuman si Evan sa mando niini. Kalit niining gibulanit si Evan ug gidaitlan ang agtang sa sumbohan sa armas nga gigunitan niini.
“Ayaw!” Nakasiyagit si Destiny sa kalisang.
“Uy,” sa adik pa nga nahitukiki og katawa. “Nagmata na ang sweetheart ni Tsong.”
Ug nangatawa ang mga adik. Ang mga pasahero sulod sa bus pulos wala maglihok tungod sa kahadlok.
“Sige, Tsong,” giingnan sa adik si Evan. “Sugdi na ninyo ang live show. Ayoha gyud ninyo, ha, aron malingaw mi.”
Nagkatinan-away sila si Destiny ug Evan. Daw managsama ang diha sa ilang hunahuna. Kabalaka sa posibleng mahitabo tali kanila kun walay makasanta sa “trip” sa lima ka adik nga nakasakay sa bus nga ilang gisakyan.
“Unsa pay gipaabot nimo, Tsong,” matud na usab sa adik ngadto kang Evan. “Sugdi na ang live show ninyo sa imong sweetheart. Ayaw kamo kauwaw. Kami ra man bitaw ang magtan-aw. Lingawlingaw ra ning ato.”
Wala gihapon maggunok si Evan. Nasayod si Destiny nga dili makahimo ang iyang maguwang sa pag-among-among sa iyang pagka-babaye. Apan unsaon nila paglikay gikan niining tinong pagkahisugamak nila karon sa mga kamot sa mga adik? Nasaypan silang managhigugmaay sa mga adik nga sabog sa drugas! -- Sumpayan pa