Gubot pa's lukot!

Si Fredmon biyudo sa edad nga 47. Adunay anak sa usa ka lalaki, 3-anyos. Si Lusing biyuda sa edad nga 40. Adunay anak usa sad ka lalaki, 4-anyos. Nagkahigugumaay sila. Nagkasabot nga mag-ipon. Nag-usa sila sa panimalay ni Fredmon sa siyudad. Gibiyaan ni Lusing ang iyang mga ginikanan sa probinsiya. Mitipon na man lang god siya sa iyang mga ginikanan human mamatay ang iyang bana sa sakit sa kasingkasing. Giuyonan na lang usab sila sa mga ginikanan ni Lusing nga adto na sila manimuyo sa siyudad. Sa kapin sa usa ka tuig nilang panagluon ni Fredmon nakaanak sila'g usa, lalaki sad.

Way trabaho si Fredmon apan makakuwarta man gihapon kay kusog man kaayong manuwat ilabi na gayod sa Banat News. Samtang si Lusing miabag man sab sa ilang kapanginabuhian kay nagbaligya man og puto. Kugihan si Lusing ug mao kana ang usa sa mga hiyas niini nganong nakagusto kaayo si Fredmon kaniya.

Apan sama sa panahon nga mausabon, kalit lang sab nga mibali ang hangin sa kahimtang nila ni Fredmon ug Lusing. Miabot ang panahon nga dili na sila magkasinabot ug kanunay nang maglalisay. Ang usa sa mga hinungdan mao ang duha ka mga bata -- ang anak ni Fredmon ug ang anak ni Lusing. Kanunay man god kining mag-away. Unya bunalan ni Lusing ang anak ni Fredmon ug labanan ang iyaha bisan way tino kun kinsa gyo'y nasayop. Mao sad si Fredmon, kun mag-away ang duha ka mga bata, diretsohon sad niya'g lusi ang dunggan sa anak ni Lusing ug labanan sab ang iyaha. Sa laktod, kun mag-away ug maghinilakay na ang duha ka mga bata, pwerte gyong gubota. Gubot pa's lukot! Apan ang ilang anak nga nagpangedaron na'g tulo ka tuig parehong pinangga nilang duha.

Usa ka adlaw niana anaa ra sa balay sila si Lusing ug Fredmon samtang ang tulo ka mga bata atua sa tugkaran nanagdula. Maayo ang ilang buot niadtong tungora. Si Fredmon nag-atubang sa iyang makinilya samtang si Lusing naghiwa sa mga dahon sa saging alang sa lutoonan niyang puto. Unya kalit silang napahunong sa ilang gibuhat kay ilang nabati nga nagkayagaw na sab ang mga bata sa gawas. Kaganina linaw kaayo ang tulo nga nagkalingaw'g dula apan karon diha na say usa nga mingaab. "Adtoa kuno rong mga bata, Fred. Naunsa na sad kaha ron?" Sugo ni Lusing kang Fredmon.

Apan daw sa wala lang mokihol si Fredmon. Nagpabiling nanampiling atubangan sa makinilya. Mora'g naglami na gyod ang iyang imahinasyon. Lisod man god laging pakgangon ning magsusulat kun maglami na ang gisuwat.

"Fredmon!" Misingka na gayod si Lusing. Adtoa tong mga bataaaa!!!"

"Lamon!" Wala sad makapugong si Fredmon, misingka sad. "O lagiiii!!!

Na, wa na sad magkasinabot ang duha. Misirit og gawas si Fredmon sa balay aron pagsusi sa mga bata. Unya....

"Ngano na, Freeeddd???" Misinggaak si Lusing. Isog kaayo. "Naunsa naaa???"

Mibalos pod og singka si Fredmon. "Singggg!!! Ang imong anak ug ang akong anakkkk! Ilang gitabangag away ang atong anak!" "Bangas ka!" (Kataposan)