Ang Impiyerno ni Belen - 2

Ang maong kamalig nga nahimutang taliwala sa fishpond maoy nahimong bag-ong tagboanan namo ni Galen. Hilit ang maong dapit. Wala gyu’y kasugawnan bisan unsa pay buhaton namo ni Galen didto.

Pinaagi sa text, kadali ra ming magkasabot si Galen nga magtagbo didto sa kamalig taliwala sa fishpond. Ug sa higayon nga magtagbo mi didto, tagbawon gyud namo ang among kaugalingon pagtagay sa lawasnong kalipay. Subli-sublion namo pagkatkat ang kinatumyan sa langit.

Hangtod nga miabot ang panahon nga may nadiskobrehan kong tinagoan sa matuod nga pagkatawo ni Galen.

Ginaingon nga walay asong makumkom. Sa samang paagi, walay tinagoan nga dili madayag sa kapulihay. Mao nga sa kadugayan, nadiskobrehan ko ang matuod nga bulok sa pagkatawo ni Galen.

Akong nasuta nga dilid diay siya sama ka buotan segun sa akong pagtuo bahin kaniya. May tinagoan siya. Ug siya mismo ang nagtukas sa iyang maskara aron masayran ko ang iyang sekreto. May dautang bisyo diay si Galen. Bisyo sa illegal nga drugas. Sa shabu!

“Tiggamitan diay ka ini?” Nakapangutana ko niya dihang mihithit siya og shabu human sa among pagtagay sa lawasnong kalipay sulod sa kamalig nga nahimutang taliwala sa biniyaan nga fishpond.

“O,” laktod niyang tubag. “Ginagmay lang gud. Pakondisyon.” -- Sumpayan pa