Nalangan nga kabuntagon

Ang drayber mipakusog sa pagpadagan sa gimanehong sakyanan. Wala na sila magsubay sa highway. Mao nay ilang gisubay ang karsada paingon sa bukiran nga bahin sa Sugbu.

“Sublion ko,” miingon kadtong adik nga maoy unang milanit og armas kaganina. “Trip lang namo ni. Way masakitan ninyo basta motuman lang kamo sa gusto namong mahitabo.”

“Gusto lang ming makakita’g live show,” nagkanayon ang laing adik nga bagis kaayo’g panagway gumikan sa kalabong sa bungot niini.

“Gusto ming makakita'g aktuwal nga panag-sex sa lalaki ug babaye,” matud sa adik nga maoy nagtion og armas sa drayber. “Kami ang magpili sa babaye nga gusto namong mo-perform. Pero dili kami ang mopares sa babaye. Mopili usab kami’g lalaki diha kaninyo nga maoy makigpares sa babaye nga among mapilian.”

Gikuyawan si Destiny sa iyang nadungog. Misantop sa iyang hunahuna nga nayabag na gayod pag-ayo ang hunahuna niining maong mga adik. Alang kaniya, dakong binuang ang buot nilang mahitabo.

“Ikaw pili, Tsong,” giingnan sa adik nga nagtion og pistola sa drayber ang kauban niini nga maoy ubang milanit og armas kaganina. “Okey,” misanong ang maong adik.

Ug misugod kini pagsuhid sa mga pasahero. Maoy unang gisuhid niini ang mga pasaherong lalaki ug babaye nga naglingkod didto sa luyong bahin sa bus. Apan ingon sa wala kini napilian. Mipaingon kini sa atubangang bahin sa bus. -- Sumpayan pa