Nalangan nga kabuntagon

Gula 26

Misakay gilayon sila. Sa ikaduhang lingkoranan luyo sa drayber sila mipahimutang. Nagtupad sila.

Wala madugay, milarga na ang bus nga ilang gisakyan.

Dangtan og pipila ka gutlo sa pagbiyahe, sama sa sagad mahitabo, nangatulog na ang mga pasahero. Misandig si Destiny sa bukton ni Evan kay giabot usab siya og pagduka.

Nahikatulog si Destiny.

Apan napugwat siya dihang milanog ang kusog kaayong tingog sa sulod sa bus nga ilang gisakyan.

“Way mopakita’g daotang lihok!” Nagkanayon ang usa ka batan-ong lalaki nga naggunit og .45 kalibreng pistola. Ang mga mata niini pula kaayo, maila nga nailawom kini sa impluwensiya sa ginadiling drugas.

Misunod usab paglanit og mga armas ang upat ka kauban sa maong batan-on nga pulos usab sabog sa drugas.

“G-Ginoo ko,” nakatuaw si Destiny gumikan sa gibating kalisang.

Nahiabot na ang bus nga ilang gisakyan sa awaaw nga dapit. Kinsay makaluwas kanila gikan sa mga kamot niining lima ka tawong armado nga nakasakay sa bus nga ilang gisakyan? Seguradong may buhaton gayong daotan ang maong mga adik ngadto sa mga pasahero sa bus.

“K-kuya,” migunit si Destiny sa bukton ni Evan. Nahadlok na siya pag-ayo.

“Ayaw paglihok,” giingnan siya ni Evan. “Sandig lang nako. Pagpakaaron-ingnon nga natulog ka.” -- Sumpayan pa