Ang Impiyerno ni Belen - 2

Gula 50

Mibanos pagpuyo sa maong balay ang pamilyang Ocay. Pero wala abtig usa ka bulan namiya sila kay wala makaantos sa hamok. Hapit tanang gabii silang gihasi sa usa ka multo nga walay ulo. Sukad niadto, wala na gyu’y nangahas pagpuyo sa maong balay. Hangtod nga nahimo kining tagboanan namo ni Galen.

Misantop sa akong hunahuna nga kami ni Galen ang gikatingad-an sa mga molupyo sa Kabando. Nakamatikod na diay sila nga may tawong magtikaw sulod sa maong balay panahon sa sayong kagabhion. Wala lang silay kaisog sa pag-usisa maong wala nila masayri nga kami si Galen ang mag-adtoan sa abandonadong balay. Nalisang sila sa supernaturals. Nagtuo silang mga engkanto kami si Galen.

Sa akong nasayran, misantop sa akong hunahuna nga sa madugay o sa madali posibleng madiskobrehan sa katawhan sa Kabando nga dili mga engkanto ang ilang namatikdan nga magtikawtikaw sulod sa abandonadong balay panahon sa kagabhion kon dili kami si Galen.

Niini, naka-realize ko nga samtang wala pa mi mailhi sa katawhan nga nakamatikod na sa among presensiya sa abandonadong balay, kinahanglang makakita na kami si Galen og laing dapit nga tagboanan. -- Sumpayan pa