Ang gitarang bagol

Nahipugwat si Titords ning hapona. Sa sulod sa iyang payag nga gipuy-an, maoy nabati niya ang katingalahang tingog. "Titords! Naayo na ang imong gitarang bagol! Pwede ka na sab nga makapadayon og panaygon ning paskoha....!"

Hilabihang lipaya ni Titords nga mitutok sa gitarang bagol nga gidan-ok niya sa suok. Bag-o na tuod ang iyang gitarang bagol! Mora’g bag-o nga hinimo ang naguba ug nagupok na niyang gitarang bagol. Daw sinilakan! Daw sinilakan! Dili na bali ang tapyanan ug ang lawas niining kahoy. Bag-o na ang mga kwerdas niining wayir. Bag-o ug sinaw na usab kaayo ang bagol nga nagupok.

Gikuha ug gipunit ni Titords ang gitarang bagol. Nakapahiyom siya nga milingilingi sa sulod sa iyang payag. Kinsa man kadtong tingog nga iyang nabati ganiha? Apan wa siyay tawo nga nakita. Kinsa may nag-ayo sa gubaon na niyang gitarang bagol?

Matag pasko, gamit kaayo ni Titords ang iyang gitarang bagol sa pagpanaygon, nga maoy kabilin niya sa namatay na niyang mga ginikanan. Manaygon siya sa tanang kabalayan sa ilang baryo ug sa kasikbit nga mga baryo sa siyudad sa Danao. Pinaagi sa gitarang bagol, bugtong niyang panapian ang pagpanaygon matag pasko. Sa edad nga 40 ug gulang ulitawo, trabahador sa asyenda si Titords nga monas ginhawa'ng milahutay sa pagpakabuhi sa tumang kakabos.

Sa pag-entra sa unang semana sa Disyembre, nanaygon dayon si Titords sa ilang baryo sa Luyang. Apn nabiktima siya sa paregla sa mga estambay sa baryo, pinangulohan ni Budoy. Gidelensiya ang tanan niyang dinaygonan sa eskinang tindahan sa baryo.

"Ayaw'g dugay og hatag, Titords!" singka ni Budoy.

"Gusto tingalig bun-og....!" dason ni Pulok.

"Ambi nang gitara mong bagol...! singhag ni Miyot nga miilog dayon sa gitarang bagol.

Pulos na hubog sa binong ilimnon si Budoy ug ang duha ka kauban nga sila si Pulok ug Miyot. Gikuha dayon ni Budoy ang gitarang bagol ni Titords ug gipuspos sa dalan. Nabuak ug nagupok ang bagol. Nabali ang lawas nga kahoy sa gitara nga maoy gitauran sa mga istratses, kuwerdas ug lisoanan.

Nakatilaw pa gayud og santako si Titords gikan kang Budoy. Way kusmod nga mipauli si Titords sa ilang balay nga nagbitbit sa nabali ug nagupok na niyang gitarang bagol. Nahunong sa pagpanaygon si Titords.

Ug ning gabhiona, dako na nga kantidad ang kinitaan ni Titords sa iyang pagpanaygon sa gitarang bagol. Tagming kaayo ang tingog sa naayo na niyang gitarang bagol. Minindot sab ang tingog ni Titords sa pagkanta, tungod sa iyang gitarang bagol.

Apan sa pagpauli na ni Titords sa lawom na ang gabii, giatangan na usab siya nila ni Budoy, Pulok ug Miyot nga nangdelehensiya na usab sa iyang dinaygonan.

"Remit dayon sa dinaygonan...!" nagsenyas-senyas dayon si Budoy.

"Aron di na sab mabun-og ba...!" nagkihatkihat si Pulok.

"Aron dili na mausab pagkagupok ang gitara mong bagol!" dason ni Miyot.

Apan sa kahibulong ni Titords, kalit lang mihagiyos ug milupad ang gikuptan niyang gitarang bagol ug gibunalbunalan ang mga nawong ug lawas nila ni Budoy, Pulok ug Miyot. Nahagsa ang tulo ka bugoy sa dalan nga nawad-an sa panimuot. Daghang mga tawo sa eskinang tindahan nga mibilib kang Titords.

Sa pag-abot ni Titords sa iyang balay, nabati na usab niya ang katingalahang tingog.

"May birtud ang maong gitarang bagol! Wa nay makasipala nimo. Siya na ang imong badibadi ning paskoha ug hangtod sa kahangtoran...."

Igo lang nakapanglingo si Titords nga mitutok sa iyang gitarang bagol. (Kataposan)