Gula 25
“Mao gyud.”
“Unya,” mikalit lang og kaligdong ang nawong ni Devin. “Kumosta na man ang gugma nga akong gipadayag nimo? May paglaom na ba?”
Wala motingog si Destiny. Miduko siya. Gitimbangtimbang niya kon unsay ipakanaog niyang hukom karon.
“Dugay na kong nag-antos, Destiny,” ni Devin pa. “Siyaro na man sab kon hangtod karon wa ka pa gihapon makadesisyon.”
“Nakadesisyon na ko, Devin,” ni Destiny pa.
“H-ha?”
“Oo. Nakadesisyon na ko nga dawaton ang imong gugma.”
Labihang lipaya ni Devin pagkadungog sa iyang desisyon. Kuwang na lang nga dili kini molukso sa iyang atubangan.
Apan sa iyang bahin, hilaw nga pahiyom ang mibathay sa mga ngabil ni Destiny. Wala siya malipay sa hingpit sa gipakanaog niyang hukom. Ang iyang gihimo mao lang ang pag-experience kon unsay feeling kon dunay uyab. Kay ang tinuod, wala gayod siya mahigugma kang Devin.
Ang lintunganay’ng hinungdan kon nganong gisugot niya si Devin mao nga gusto siyang dili maalkanse sa iyang kuya Evan nga makadaghan na mag-ilis-ilis og uyab.
Sayo sa buntag diha na sila si Destiny ug Evan sa South Bus Terminal. Nagpahatod sila’g taxi aron madali sila sa pag-abot sa terminal. Naatol sab nga dihay Ceres bus nga lumargahay na sa ilang paghiabot. -- Sumpayan pa