Nakabawos gyud si Fred

Si Fred himasa kaayo og Banat News apan ang nakaparat kay dili gyod siya mopalit. Manghuwam lang siya sa iyang silingan nga si Israel. Usa ka adlaw niana igo pa lang ganing nakahuman og pamahaw, miadto na sab si Fred sa ilang Israel.

"Uy, ikaw man diay, Bay Fred. Unsay ato?" Ni Israel pa nga nagsabod og tuktokon sa iyang mga manok sa tugkaran.

"Aw, sama sa naandan, Bay El, manghuwam na sad ko’s imong Banat News. Hibawo ka bitaw'ng ampay gyod nakong basahon ning peryodista." Nagtingsi Fred.

Namapha si Israel sa iyang mga kamot samtang nagtan-aw sa iyang mga manok nga naningaon sa tuktokon nga iyang sinabod.

"Hahay ning tawhana, wa pa gani ko makahuman og basa kay nagpatuka pa ko’s mga manok, nia na sad kay manghuwam," nagtagawtaw sa hilom si Israel. Unya may nahunahunaan siya.

Bay Fred."

"Ngano, Bay El?"

"Pahuwamon tika pero aylag dad-a. Sugod rong adlawa ang mohuwam sa akong Banat News anhi lang sa balay mobasa, okay?"

"Nasagmuyo si Fred. "Aw, oks kaayo, Bay El." Apan sa hilom nakahunahuna si Fred nga mobawos kang Israel.

Gipasulod ni Israel si Fred sa ilang hawanan, gipalingkod, gitunol ang Banat News.

"Dinhi sa ka, Bay Fred, ha, kay ako sang tiwason tong akong gibuhat sa gawas. Pagkalingaw la’g basa diha."

"Sige, Bay El."

Pagbalik ni Israel sa sulod...

"Bay El," matud ni Fred nga nagtinambid samtang naglingkod.

"Ngano, Bay Fred?"

"Kang Bartolome na man pod diay'ng sugilanon rong guwaa, no?" ni Fred.

"Bitaw. Kusog sad na’s Tolome, da. Alegre ra ba ang iyang mga estorya."

"Molagi. Sige, Bay El ... hurot-hurot na nako’g basa tanan. Adto na ko."

"Sige, Bay Fred."

Sa dihang nakalakaw na si Fred nagpanglingo si Israel. "Himasa’g Banat News pero anhi lang sige’g huwam." Nakatuaw si Israel.

Pagkaugma sa susamang oras didto na sab si Fred sa ilang Israel kay manghuwam na sa’g Banat News.

"Sige, Bay Fred," ni Israel. "Basta sa gikaingon ko na, ang mohuwam sa akong Banat News anhi lang sa balay mobasa."

Milingkod si Fred sa sopa human itunol ni Israel kaniya ang peryodiko. Ug pagkahuman niya’g basa...

"Bay El, naunsa man ning inyong salog nga tabla nga nagkaga man lang ni? Wa man ni lulampaso?" Matud ni Fred human niya ikabutang sa sopa sa Banat News.

"Kahunahuna bitaw ta ko’g lampaso ana, Bay, pero wa man god mi’y lampaso."

"Tuay akoa, Bay," tubag ni Fred. "Di ka mohuwam?"

"Aw, sige, adtoon nako’s inyo ugma."

Pagkaugma sa hapit na moudto didto na si Israel sa ilang Fred. "Bay El, manghuwam na ko’s imong lampaso."

"Okay," tubag ni Fred. Sa iyang hunahuna makabawos na gyod siyang Israel. Ug sa didto na sila sa hawanan sa panimalay ni Fred....

"O, nia rang lampaso, Bay El." Matud ni Fred human niya’g kuha sa lampaso sa luyo sa sera. Pero ang mohuwam sa akong lampaso anhi lang sa balay manglampaso, okay?"

"Butangi!" Tuaw ni Israel. (Kataposan)