Nalangan nga kabuntagon

 Gula 23

“K-kinsa?” Sukit ni Destiny.

“Ang imong prince charming, si Devin. Naa siya sa sala.”

Daklit nga nakapamalandong si Destiny. Nahinumdom siya nga gisaaran man diay niya si Devin nga mahimo na kining mamisita kaniya human sa ilang final exams. Nagtimaan gayod diay ang ulitawo sa iyang gisulti.

“Atubanga siya, Sis,” ni Evan dayong biya sa iyang kuwarto.

Gibalik ni Destiny pagtak-op ang pultahan sa iyang lawak. Giareglar niya ang iyang kaugalingon atubangan sa salamin. Nakahukom siyang atubangon si Devin. Iyang pakigsultihan ang lalaki nga dugay nang nangulitawo kaniya.

Paggawas niya sa iyang lawak, milahos siya sa sala. Iyang natukmaan si Evan nga nakighinabi kang Devin. Mitindog ang iyang maguwang pagkakita niini kaniya. Nasabot ni Destiny nga buot kining mohatag og higayon aron magkasulti’g maayo sila si Devin.

Milingkod si Destiny sa sopa nga atbang sa gilingkoran ni Devin.

“Wa ba ko makadisturbo nimo?” Sukit sa ulitawo.

“Wa man,” mubong tubag sa dalaga.

“Alegre man diay ikasulti kanang imong maguwang,” ni Devin.

“Karon ka pa ba diay ana niya?”

“Oo. Karon pa man mi magkasulti’g dugay-dugay.”

“Unsa may inyong gipanagsultihan?” -- Sumpayan pa