Ang amaw nga nahimong usa ka bayani

Samtang naglakaw ako padulong sa among eskuwelahan, sa Tabogon Central School, nadapit ang akong pagtagad sa pipila ka buok mga bata nga nanagpundok diha sa may bus terminal   nga anaa mahimutang sa sulod sa merkado sa lungsod.

Sa akong tan-aw, mora silag dunay gialirungan, ug gitan-aw. Kay nagliyukay man sila. Gani, diha may pipila usab ka mga dagko nga nahiipon kanila. Mga kundoktor tingali to, ug dili ba mga helper lang.

Sa dako kong kaikag, miduol ako sa pundok. Gusto man sab gud nakong mahibaw-an kun unsa ilang gipundokan. Natingala man lang gud ko, kay manghugyaw man usahay sila og pangatawa. Unya, duna say mokalit lang og dagan biya sa pundok, apan mobalik lang usab dayon.

Sa dihang nahaipon na ako sa pundok, mao gayuy akong nakita ang usa ka batan-ong lalake, nga nagpangidaron lang tingali og mga diseotso ka tuig, ang naghigda sa semento, kun sa sawog sa paradahan.

Gihigtan og straw ang usa ka tiil niini. Ug ang usa ka tumoy sa straw gihigot usab sa poste sa elektrisidad. Wala lang gayud mokihol ang maong batan-on, bisan og gisigihan kinig itsa og bisan unsa nalang sa ubang mga bata.

Makalihok lang hinuon usahay kini, kun maigo na gayud ang nawong niini, sa mga gagmay'ng bato o tansan ba nga ilabay ngadto kaniya sa pipila ka mga bata. Igo man lang gud nga gitabunan ang iyang nawong sa usa niya ka kamot. Kay ang usa niya ka kamot, iya man nga giunlanan.

Kalit lang nga nabungkag ang among pundok, sa dihang giabog na kami ni Mr. Josh Bughao, ang among maestro sa Grade Five. Ug giingnan nga paadtuon na sa among tagsatagsa ka mga classroom kay hapit na kuno ang oras nga tingklase.

Nianang pagkahapon, sa pag-uli ko na sab gikan sa eskuwelahan, nakit-an ko na sab ang maong batan-on diha sa may merkado. Gisulogsulog kini sa mga bata ug gisinggitan og "amaw". Wala hinuon kini masuko. Hinuon nagsayawsayaw pa kini. Ug nakaingon hinuon ko sa akong kaugalingon nga, "amaw gayud tuod."

Usa ka adlaw niana, naalarma kaayo ang mga kapolisan, sa among lungsod. Nakadawat man gud ang ilang hepe og usa ka "Intelligence Report" nga duna kunoy mga armadong tawo nga nagsakay og usa ka luhong sakyanan. Ang tuyo kuno niining mga tawhana, mao ang pagpangidnap og mga bata, aron ipalukat sa ilang mga ginikanan.

Lakip nga naalarma mao ang mga kadagkuan sa mga eskuwelahan sa among lungsod. Gipahibawo man gud sila sa hepe sa mga kapolisan. Gani, mihatag na usab sila og mga pahimangno sa tanang mga eskuwela. Mipasidaan kini kanamo nga dili gayud palakton nga morang usa. Kun mahimo, magpahatod kini kun moadto na sa eskuwelahan. Ug magpakuha usab inigkahapon.

Nianang pagkabuntag, mao gayuy akong nabalitaan nga duna kunoy mga armadong tawo nga nadakpan. Ug gidudahan nga ang maong mga tawo mao kadtong giingong mangidnap og mga bata.

Ug natingala nalang ako, sa dihang akong nahibaw-an nga kadto diay'ng batan-on, nga gisugsog og "amaw" sa mga bata, usa diay sa nakatabang aron madakpan ang mga suspetsado. (Kataposan)