Gibatig kasina si Merkuryo sa kasikat ni Amargo dinhi sa ilang lungsod. Halos ang tanang mga dalaga bation gyud og crush kang Amargo kay gawas nga guwapo kini siya, maayo pa gyud kaayo moduwag
basketbol ug ang ilang team mao ang kampiyon sa miaging tournament niadtong miaging tuig.
Pero alang kang Merkuryo si Amargo maoy usa ka babag sa iyang tinguha kang Elizana, ang matahom nga dalaga nga anak sa ilang mayor dinhi sa lungsod sa Magtawas. Dinhi sa ilang lungsod kining duha ka adunahan nga pamilya daan pa gyud kaniadto nga dili gyud magkaduol.
Si Bartolo nga amahan ni Amargo mao ang kanhi mayor dinhi sa ilang lungsod apan gipildi kini ni Marcelo nga amahan ni Merkuryo. Busa, hangtod karon sa ilang mga anak anaa gihapon ang basuni sa kaligutgot personal tali sa duha ka pamilya.
Dato sila si Bartolo ug mao sab sila si Marcelo nga nailhan sa ilang dakong panagatan. Ug mao lagi kining duha ka pamilya nahibaw-an na sa mga lumolupyo dinhi sa lungsod nga mga kaliwat og mga ungo. Si Bartolo anak sa pinakamangtas nga si Matias ug si Marcelo anak usab sa labing bangis nga ungo sa pikas lungsod ug dihang namalhin ang maong pamilya dinhi sa lungsod sa Magtawas ingon sa gibati nag kahadlok ang mga tawo.
Espoko moy duha ka mga adunahan nga pamilya ug kaliwat og mga ungo nia na karon sa lungsod sa Magtawas, apan dili nila matandog ang maong mga pamilya tungod lagi kay mga sapian ug kuwartahan kini sila. Ug ang ilang pagdinumtanay gitiwas sa ilang mga anak nga si Merkuryo ug Amargo. Unya, usa ka hapon sa balay nilang Bartolo, may gisulti kini sa iyang anak.
“Amargo, anak,” matud pa niini. “Likayi lang gyud si Merkuryo aron way kagubot nga moulbo tali kanila ug kanato...”
“Bitaw , Pa, dili na maayo ang pagdinumtanay. Pasko na gud sa sunod semana,” mora’g miuyon usab si Amargo. “Pero, kun iya gyud kong biklon dili ko siya sibogan. Usahay ra ba, mag-abot kami sa balay nilang Elizana ug hait kaayo siya’g tinan-awan nako...”
“Likay lang gyud, Amargo,” bugnaw nga mitambag si Bartolo.
Miyango ang anak sa tambag sa iyang amahan. Unya, dihang dunay Christmas Party nga gihimo didto sa balay nilang Elizana, wala gyud makalikay si Amargo, gibikil gyud siya ni Merkuryo.
Daghan ang mga bisita nila ni Elizana ug dunay pagbayloay ug mga Christmas gift. Ug kay anha man gyud magduolduol si Elizana kang Amargo mora’g mibukal ang dugo ni Merkuryo sa selos ug wala niya kapugngi ang iyang kaugalingon ug iyang gisuntok si Amargo.
Dinhi mibawos si Amargo ug nahitabo ang hilabihang kombati sa duha ka ulitawo nga mga ungo. Wala gyud nila mapugngi ang ilang kaugalingon kay samtang sila nagsumbagay nangausab ang ilang mga bayhon ug hitsura. Nangahimo silang mga mangtas nga ungo.
Sa kalisang sa mga bisita nga didto sa Christmas Party nagdinaganay sila paingon sa silong, samtang sila si Merkuryo ug Amargo nagpadayon sa ilang pagbugno. Mga bangis na kaayo sila.
Ug unya nangahulog sila sa bentana ug didto sa tugkaran, nagpadayon lang gihapon ang kabangis sa duruha sa ilang binugnoay. Naninggit na ang ubang mga dalaga ug ang ubang mga ulitawo nanagan usab sa kahadlok nga basin og mapiksan sila.
Gikan sa tugkaran nila ni Elizana nangabot sila si Merkuryo ug Amargo sa ilang panagbugno didto sa may titip nga pangpang ug didto nangahulog sila. Ug nahilom ang tanang mga tawo nga nakasaksi sa pagkahulog sa duruha sa bung-aw.
Ug kay wala na man nila makita ang duha ka mangtas, namauli na lang ang mga tawo nga inimbitar ni Elizana, ug mikitib lang ang ilang mga baba nga nagsugod na sa paglitok sa pangalan nila ni Merkuryo ug Amargo, matud pa nila.
“Tan-awa, di ba milutaw na gyud ang ilang pagka-ungo!” may miingon.
“Sus, puwerte gyud diay’ng mangtasa nila. Tinuod diay gyud ang mga tabitabi dinhi sa ato,” mitubag usab ang usa ka babaye.
“Oo, tinuod na. Apan, unsaon man, Pasko ron ug dili maayo nga magbaton og kalain sa buot ngadto sa masig ka tawo, ma-ungo man sila o dili,” nagkanayon ang anak sa Vice-Mayor. Unya, may misinggit nga guwatsinanggo. “Hoy, mga ungo, hapit na ang 2010, Pag-usab na sa inyong pagkamangtas ug Merry Christmas kaninyo!” – Kataposan