Ang Impiyerno ni Belen - 2

Gula 43

Makabuang ang kalaay dihang ako na lang usa sa balay. Gihimo ko na ang tanang paagi aron pagpukan sa kalaay apan wala kini mosalir. Maong misulod ko sa banyo ug nagdali-dali sa pagkaligo. Pagkahuman, nag-ilis dayon ko. Nakahunahuna kong molakaw aron paglingaw sa akong kaugalingon.

Misantop sa akong hunahuna nga mag-internet ko sa usa ka internet cafe sa merkado.

Apan igo lang kong nakahuman og ilis, nahiabot si Galen sa balay. Kalit nausab ang akong hunahuna. Dili na lang ko moadto sa merkado aron unta mag-internet.

Sa sala, gipalingkod nako si Galen. Milingkod ko sa iyang atbang.

“Hapit gyud ta wa mag-abot,” giingnan ko si Galen. “Molakaw ra ba unta ko.”

“Asa ka man diay unta moadto?” Nangutana si Galen.

“Sa merkado. Gilaay man gud ko nga mao rang usa dinhi’s balay. Maong nakahunahuna kong mag-internet.”

“Nakita man nako ang imong Papa ug Mama nga nanakay og habal-habal kaganina. Asa man diay to sila, Belen?”

“Sa Abaca. Magkuha to sila sa among bahin sa abot sa among basak nga gisaopan.”

Wala motubay si Galen sa akong gisutli. Milirawliraw ang iyang mga mata sa palibot sa sala. Unya mibalhin siya’g lingkod sa akong tupad.

“Malipayon ka ba sa atong relasyon? gikan ni Galen. -- Sumpayan pa