Ang babaye nga akong magbalantay

Aniay lain kong kasinatian sa sobrang inimnanay og ilimnong beer nga miresulta sa akong pagkahubog ug mihay-ad ko sa paghigda sa aseras, daplin sa dalan Colon. Apan suwerte kay wa gyuy nagparegla ug nagpasipala kanako, tungod sa akong kahibulongang guardian lady nga maoy nagbantay kanako niadtong higayona.

Tuig 2003. Nahimo kong suking imnanan kanhi sa Golden Trust nga nahimutang kilid sa Eden Theatre. Gawas nga pulos mahigalaon ang mga waitress (GRO na karon), guwapa ug seksi usab kaayo sila nga makig-table sa mga kustomer.

Nabatasan sab nako nga mag-inusara kong mosulod sa maong imnanan, ilabi na kun baga ang sulod sa akong pitaka matag kinsenas o tapos sa bulan, nga bag-ong makakobra sa akong suweldo.

Gibalewala ko lang gayud ang tambag sa akong asawang si Nene nga pahunongon na ko sa akong bisyo sa pag-inom og beer nga mosangpot sa akong pagkahubog.

"Don, sakop ta sa Servant Community, apan morag way pulos ang kanunay tang pagrosaryo kang Mama Mary, kun dili ka gayud mobiya sa imong bisyo sa pag-inom og ilimnong makahubog...!"

"Nene, lingawlingaw lang god ning akoa! Bisan usahay mahubog ko, wa man sab koy palta sa tanang kalihokan sa atong Servant Community! Kanunay man sab kong magrosaryo ni Mama Mary...!" hilabihan kong nakapangatarongan ngadto sa akong asawa.

Nahinaykan gyud nako ang pag-inom og beer sulod sa Golden Trust. Lalim bay nakahurot ko'g 6 ka mga grandeng beer. Sus, nanginit ang akong agtang. Morag naglutaw ko's hangin nga migawas sa maong imananan. Nawad-an ko'g panuhod sa tumang kahubog. Maoy nabatyagan ko nga miyaka ko sa aseras. Unya, miligid ko sa paghigda sa aseras, daplin sa dalan Colon, sa way pupanagana nga kuyaw ang akong kahimtang sa mga bugoy ug isnatser niadtong orasa sa alas 2 sa kaadlawon. Bisan nag-awop-awop ang akong panan-aw sa tumang kahubog, apan naaninaw ko ang panagway sa usa ka babaye nga daw sinati ko ang panagway nga nagbantay kanako ug nadungog ko pa gayud ang iyang tingog nga naghangyo niadtong lumalabay nga mohunong ug mopasiklap kanako nga nagligid paghigda sa aseras.

"Ayaw ninyo siya pasipad-i! Buotan siya nga tawo! Nasobrahan lang siya sa pag-inom...!"

Porbida, nabuntagan gyud ko nga naghigda sa aseras, daplin sa dalan sa Colon. Naulaw ko's akong kaugalingon nga nagkalingilingi. Suwerte gyud nga wa ko pareglahi sa mga bugoy sa Colon.

Diha ang akong gold nga kwentas nga nagbitay sa liog, ang akong Rado nga relo ug ang pitaka sa bulsa nga intak gihapon sa papel-de-bankong kuwarta.

Nakahangad ko ug nagpasalamat kang LORD. Hilom sab kong nagpasalamat kang Mama Mary, kay nagtuo ko nga siya gayud ang babaye nga nagbantay nako niadtong higayona aron luwas ko sa pagpasipala sa mga daotang elemento sa dalan Colon.

Tingog ni Mama Mary kadtong akong nabati nga di ko pahilabtan nga naghigda sa aseras tungod sa tumang kahubog.

Sukad niadto ug hangtod karon mibiya na ko sa pag-inom og beer nga ilimnon aron dili nako makasinati og pagkahubog. Karon, mipulos na ko sa Ginoo uban sa Charismatic Renewal. (Kataposan)