Gula 37
Pagkasunod gabii mibalik gyud si Galen sa balay. Sa sinugdan, ang akong Papa maoy iyang gihinabi. Dihang nahuman na ang akong gibuhat sa kusina, miadto ko sa sala aron pag-entertain kaniya. Si Papa mibiya sa sala aron paghatag og privacy namo ni Galen.
Miligdong dayon ang panagway ni Galen dihang nagkaatubang na kami. Dili na sama sa nakalabay nga gabii nga bisan unsa lang ang among gihisgotan. Niining gabhiona, mao nay nasentro sa among panagkabildo ang butang nga may labot ang kasingkasing. Nangulitawo na si Galen nako.
“Nganong ako man gyud ang imong gipanguyaban?” Gipangutana ko si Galen aron pagsuta sa kamatinud-anon sa iyang pagpaninguha nako. “Nasayod ka baya nga buwag ko sa akong bana. Nganong dili man ang usa ka pure nga dalaga maoy imong pangulitawhan?”
“Dili katudloan ang kasingkasing, Belen,” matud ni Galen. “Ikaw ang akong gihigugma.”
“Nakaseguro kang gugma gyud kanang imong gibati nako?”
“Nakaseguro ko. Karon lang ko nibati og ingon niini.”
Wala ko motingog.
“May paglaom ba ang akong gugma, Belen?” Misukna si Galen pagkilab sa pipila ka daklit.
Wala ko motubag. Naglibog ko kun unsay itubag kang Galen. Pero sa hilom, kasugtonon na ko niya. -- Sumpayan pa