Ang Impiyerno ni Belen - 2

Gula 36

Tuod man, gituman ni Galen ang iyang gisulti. Pagkasunod gabii, igo lang ming nahuman og panihapon, nahiabot siya nga nagdala og ice cream. Sa sala, nagsultihanay ming duha. Bisan unsa lang ang among gipanagsultihan. Wala lang namo mamatikdi ang pagpanglabay sa mga takna kay nalingaw mi sa among panagsulti. Lawom na ang kagabhion...

Mingaw na ang palibot. Sila si Papa ug Mama nangatulog na sa ilang lawak. Apan kami si Galen nagpadayon pa sa among panagkabildo sa sala. Nalingaw ko sa among panagsulti kay matag karon ug unya isal-ot man niya ang iyang mga pasiaw.

Dihang hapit na ang alas onse sa kagabhion, nanamilit na si Galen. Pero misaad siyang mobalik inigkasunod gabii. Gi-lock dayon nako ang front door sa balay dihang mipauli na si Galen sakay sa iyang motorsiklo. Unya misulod ko sa akong lawak aron matulog na usab.

Apan samtang naghigda ko sulod sa akong lawak, wala ko batia og pagduka. Si Galen ang nanumbalay sa akong hunahuna. Nalipay ko sa iyang pagbisita nako. Daw dili mahubit sa pulong ang akong kahinangop sa iyang pagbisita nako sa balay.

Wala ko makasabot sa akong kaugalingon. Nabatyagan ko nga mora’g mosayaw ang akong kasingkasing sa higayon nga maghunahuna ko kang Galen. -- Sumpayan pa