Tambok nga gamay'g kaon

Nagkindangkindang si Gerry sa iyang linaktan ning sayong kagabhion sulod sa basement sa Gaisano Country Mall. Bag-o lang siyang naka-order sa Lumpia House og usa ka puso, dugodugo ug fresh lumpia. Nagsapnay siya sa tray nga gipatungan sa iyang order samtang nagkindangkindang ngadto sa bakanteng lamesa di layo sa counter sa Lumpia House. Nagkindangkindang iyang linaktan tungod sa iyang katambok. Ang iyang lawas mora gyud kadak-a og multicab. Kapin kun kulang iyang gibug-aton mga kinyentos libras. Maayo gani kay taastaas siya. Medyo 5'7" iyang height. Ang iyang ulo morag usa ka lugas ubas nga gipatong sa usa ka bowl nga haluhalo.

Grabe gyud ka daku si Gerry. Trayenta anyos pa siya. Ulitawo pa. Di kay wa siya'y hilig sa babaye. Daghan na siyang gipangulitawhan. Way nisugot. Kay mahadlok sa iyang kadako. Bugtong anak si Gerry. Natingban siya sa pagpangga sa iyang ginikanan. Buhong siya di lang sa material nga butang, hasta sa pagkaon. Unya matud pa sa uban, kun ang tawo masulob-on, kay way makighigala, way makig-istorya, pagkaon ray kalipay. Maong nitambok pag-ayo si Gerry.

Pagkakaron, ilong tuwapos na siya. Kay dihang nagbakasyon iyang ginikanan sa Baguio, wa kaabot didto kay nakras ang ayroplano ilang gisakyan. Igo lang nakatapus si Gerry sa hayskul pagkahitabo sa iyang ginikanan. Wa na lang siya nipadayon og kurso sa kolehiyo kay wa siya'y ganang manarbaho. Kontento na siya sa iyang kahimtang.

Nakapanunod siya'g ten-door apartment sa Talamban. Ug may ten-door commercial spaces sa Canduman. Sa mga binulang abang nga iyang makolekta, buhi na siya. Di lang kay buhi, makapamalit siya's iyang mga luho. Ug makabuhi na gyud unta siya'g pamilya. Apan wa siya magdalidali sa kaminyoon. Naghulat lang siya nga basin may babayeng tambok o bisag dili tambok, nga mahigugma og tambok nga sama kaniya.

Nilingkod si Gerry sa bakanteng lingkuranan nga iyang napilian. Daghan pa mang mga bakante sa nanaglaray nga mga lamesa ug lingkuranan ilawom sa basement sa Country Mall. Giplastar niya sa lamesa ang platito nga may puso, ang platito nga may fresh lumpia ug panaksan nga may dugodugo. Gikuha niya ang kutsarang tinidor ug gipatong sa platito nga may puso. Gipadaplin niya ang tray.

Gibuak niya ang puso nga may hiwa na sa tunga. Gihukas niya ang lukay sa lubi nga putos niini. Gihiklin niya ang putos sa puso. Gihiwahiwa niya ang puso pinaagi sa kutsara. Nagsugod na siya'g kaon. Hinay kaayo iyang kinan-an. Ang iyang pagkaon palabay sa oras. Wa siya'y gidalian. Kutob sa tawo nga maagi sa iyang duol makatutok gyud kaniya. Unya makapahiyom. Kay dili kasagaran ang hitabo nga ang tawong tambok kaayo, gamay ra'g kaonon. Usa ka puso ug gamay'ng sud-an, duha ka putahe. Daghang nahibulong sa kinan-an ni Gerry.

"Uy Gerry! Nagpa-reduce ka?" sa usa ka lalaki nga nakakita ni Gerry. Daw katalirungan ni Gerry ang lalaki. Niduol ni Gerry.

"Uy Charlie! Ikaw man-diay," ni Gerry niyahat sa kaila niya. Silingan sila sa Green Meadow Village, sa Talamban, ni Charlie.

"Dali. Mangaon ta. Order didto'g imong gustong kan-on. Ako'y bayad," ni Gerry nga nitudlo sa counter sa Lumpia House.

"Okay ra Ger. Nakapanihapon nako. Nag-grocery lang ko'g kadiyot," ni Charlie. "Nagpa-reduce ba lagi ka?" ni Charlie. Gisubli ang pangutana nga wa pa natubag.

"Wa ba diay ka kasuheto nako? Mao ra man gyud ni akong kinan-an," ni Gerry nga nagpahiyom.

"Di ko motoo, Ger", ni Charlie. Nakatawa.

"Kun di ka motoo, problema na na nimo," ni Gerry nga nagpahiyom sab. Nipadayon sa pagkaon.

"Ari sa ko Ger," nanamilit si Charlie.

"Sige" niyango si Gerry. Nipadulong sa grocery section si Charlie.

Kun niinsister pa si Charlie, tug-anan na lang gyud unta ni Gerry sa tinood. Nga gikan na siya's Family Choice, dayon Chow King, Jollibee. Ug inig human niya dinhi, adto pa siya's Pizza Hut. (Kataposan)