Nalangan nga kabuntagon

Gibira ni Destiny ang usa ka bakanteng silya og milingkod atubangan sa lamesa nga gipatongan sa mga pagkaon. Nahalingi siya ngadto sa banyo. Nahuman na diay og kaligo si Evan kay abli na man ang pultahan sa banyo.

Nanguros si Destiny ug misugod sa pagkaon. Wala na niya hulata si Evan nga tingali nag-ilis pa niining mga gutloa didto sa lawak niini. Miuna na lang siya pagkaon sa iyang maguwang kay nag-apas siya sa panahon. Hapit na ang alas siyete sa buntag.

Sa naghinunga-tunga na si Destiny sa pagkaon, nahiabot si Evan. Sa nakita nga nagkaon na siya, mipahimutang na lang usab kini sa laing bakanteng silya ug misugod sa pagkaon.

Wala sila'y tingogay samtang nangaon. Namatikdan niya nga matag karon ug unya mopasiplat si Evan kaniya. Apan wala gayod niya tagda ang iyang maguwang. Wala siya motan-aw niini. Gipaspasan niya ang pagkaon.

Mitindog siya dihang nabusog na. Mipaingon sa lababo ug nanipilyo. Pagkahuman, milahos siya sa sala aron pagkuha sa iyang mga gamit sa eskuylahan.

Gisundan diay siya ni Evan ngadto sa sala.

“Unsa bay nahitabo sa akong sister nga mora man og gisapot?” Nagkanayon si Evan nga miduol kaniya.

Wala siya motingog. Gipamunit hinuon niya ang iyang mga gamit nga gipatong sa usa ka gamay nga lamesita aron mogikan na paingon sa eskuylahan.-- Sumpayan pa