Ang Impiyerno ni Belen - 2

Gula 30

Nagpadayon ang kinawat-kawat nga panagtagbo namo ni Homer. Managsama ming naulipon pag-ayo sa kaulag. Nawad-an ko’g kontrol sa akong kaugalingon ug dili gyud makabalibad sa hulhog sa tentasyon. Si Homer sab, ingon sa natingob pagtuyok ang iyang kalibotan ngari kanako.

“Magpakasal na lang ta, Belen,” nagkanayon si Homer usa ka higayon niana human sa makutas namong kombate sa kama.

“Dili ko, uy,” laktod kong balibad.

“Nganong magdumili ka man?”

“Di ko gusto’g problema. Kasado ka ngadto sa imong asawa. Tingali’g ikiha ta niya kun makabalita siyang nagpakasal ta. Concubinage or bigamy, as the case may be.”

“Nagtuo kong di na mogukod ang akong asawa nato. Siya man ang mibiya nako. Wa na gani ko masayod kun hain na siya karon.”

“Bisan na. Di maayong mokompiyansa ta. Gawas pa, di pa ko andam alang sa usa ka mas hugot nga commitment. Kontento na ko sa atong kahimtang. Mas maayo ang ingon niini kay duna pa tay kagawasan.”

Wala na mamugos si Homer. Mora’g nakasabot siya nga dili gyud ko gustong magpahigot pag-usab sa kaminyoon, labina sa sama kaniyang kasado sa laing babaye.

Milabay ang usa ka bulan human niadto. Dugaydugay na ming wala magkita ni Homer. Kun mo-text ko sa iyang cellphone, dili siya mo-reply. Kun manawag ko (sa iyang cellphone gihapon), dili makontak. Pirmeng out of coverage area. Niini, mibati ko’g kahibulong. -- Sumpayan pa