Unang namatay

Sulod sa usa ka mahalon nga motel sa dakbayan ning sayong kagabhion, andam na unta sa kombate sa kama ang managkabit nga sila si Rodel ug Cora. Kay puro man sila may kabilinggan, nag-undertime sila sa trabaho aron makauli og sayo nga mora lang og way nahitabo.

Presko na ilang mga hubong lawas ug basabasa pa. Nangalimyon ilang mga lawas sa baho sa sabong mahalon ug imported. Makapagana sa pakighilawas ang maong kahumot. Nagtupad na silang naglingkod sa malomong katre nga may kutson sulod ning mabugnaw'ng lawak sa motel.

Nihikap si Cora sa aping ni Rodel aron makigsugod na sa ilang romansa. Apan niduko si Rodel ug ningaab.

"Waaa. Hu-hu-hu-hu," way kaulaw nga nibakho siya’g kusog. Nag-untol-untol iyang abaga sa paghinilak.

Gibati’g kalooy si Cora ni Rodel. Sulod sa napulo ka tuig sa ilang tinagong relasyon, ug kasagaran kausa sa usa ka semana nilang panagtagbo dinhi sa paborito nilang motel, nasayran na niya ang tanang problema ni Rodel. Ug si Rodel usab nasayud sa iyaha. Puro masakiton ang ilang mga kapikas. Dili puwede sa sex, sumala sa mga doctor nila. Maong kining butanga wala na ni hisguti sa managtiayon.

Puro na sila sobra sa kwarenta ang edad. Apan bigot ug seksi gihapon si Cora. Si Rodel, medyo nanambok og diyutay. Ug may tambag sa doctor nga maghinayhinay sa mga tam-is nga pagkaon ug ilimnon. Kay borderline siya nga may dayabitis.

Mga daga’g ulitawo na ilang mga anak. Apan gawas sa sakit sa kapikas si Rodel nga may heart failure, problemado sab siya sa iyang duha ka anak. Iyang kamaguwangan nga si Delia, barkadista ug lakwatsera. May uyab kauban sa barkada. Ug daghang higayon nga tagpila ka adlaw siyang di mauli. Ang ikaduha ug kamanghurang anak nga si Archie, nasakpan niyang may mga gamit sa paghithit og shabu.

Usa ka CPA si Rodel. May Accounting Firm siya nga may daghang empleyado. Chief Accountant sab siya sa usa ka dakong kompanya nga gipanag-iya sa pamilya sa mga Abundio nga may real estate development. Nagtudlo sab siya’g Accountancy sa University of San Cristobal.

Si Cora usa ka magtutudlo sa saring publiko sa ilang lungsod. May Doctorate Degree siya sa Education. Ug nagtudlo sab siya magabii sa University of San Cristobal. Diha sila magkakaila ni Rodel. Nagkasumbongay sila’s ilang mga problema ug nagkasabot. Nahulog ang ilang mga pagbati sa usa’g-usa. Kay nagkahulipay sila sa tagsatagsa nila ka panginahanglan.

"Unsa may gikagul-an nimo? Nigrabe si Belen imong kapikas?" ni Cora nga mapinanggaon ang tuno. Giagbayan niya ang kabit sa walang bukton. Ug gihapohap ang dughan sa tuong palad. Nilingolingo si Rodel. Nipadayon og bakho.

"Nadakpan si Archie sa PDEA?" ni Cora. Nagpalingo gihapon si Rodel. Siging dangoyngoy. "Kun unsa man gani nang problemaha, ay la’g kaguol ana. Way problemang way solusyon!" dasig ni Cora aron unta mohilom si Rodel. Ug sugdan na nila ilang tuyo dinhi sa motel. Aron di mausik ang panahon. Kay short time ra man gyu’y kaya nila. Aron di magsuspetsa ilang tagsatagsa ka pamilya ug mga silingang himantayon ug libakera. Gigakosgakos niya si Rodel. Apan nisamot hinoon kini og ngaab.

"Nabuntis si Delia?" dugang sukot ni Cora. Nagpanglingolingo gihapon si Rodel. Nagkamuritsing na iyang nawong sa luha, singot ug sip-on. Nagsige lang gihapon siya’g dangoyngoy. "Kun mao gani ning wa ka’s kondisyon, di pass lang una ta ron. Mamauli na lang ta!" ni Cora nga nagpahiyom. Masinabtanon ra siya sa kabit. Gipunit niya iyang panty, bra ug sanina nga nagligdas lang sa sawog sa motel. Si Rodel nagsige lang gihapo’g bakho.

Paghumag ilis ni Cora, giatubang niya si Rodel nga hubo lang gihapong naglingkod sa mahunolhunol nga katre. Nagsige’g duko. Ug hinay na ang hinilakan.

"Unsa man gyud na imong problema? Ha?" ni Cora nga daw napikal na.

Gitutokan ni Rodel iyang bilahan. Ug namulong. "Dungan man unta ta pagkatawo. Nganong una ka mang namataaaaay?" ngaab ni Rodel. (Kataposan)