Nalangan nga kabuntagon

Gula 5

Mitingkag ang mga dalunggan ni Destiny dihang nabati niya nga milagubo ang pultahan sa lawak sa iyang maguwang. Unya nabati niya nga may mga tunob nga mitadlas sa hawanan sa sala. Dinhay mga yagubyob sa lalaki ug babaye nga wala niya maklaro. Nanggawas na gyud gikan sa lawak sila si Liz ug Kuya Evan niya.

Mihinay siya pagpaingon sa may bentana dihang iyang nabati nga naabli ang dakong pultahan sa sala ug nanggawas sila si Evan ug Liz. Midungaw siya sa may bentana ngadto sa gawas. Mao gayu’y iyang nakita sila si Evan ug Liz nga nag-agbayay samtang nanglakaw paingon ngadto sa gate nga puthaw.

Misurok ang dugo ni Destiny samtang nagtan-aw sa duha. Ingon sa naglagot siyang nagtan-aw nila ni Evan ug Liz nga ingon sa loving kaayo. Wala siya makasabot sa iyang kaugalingon kun nganong mibati siya’g ingon niini. Mora ba’g nagselos siya. Wala gayod siya’y gusto ni Liz alang sa iyang maguwang.

Nakita ni Destiny nga migawas sila si Evan ug Liz sa gate. Wala gayod mobiya si Destiny sa may bentana. Gipanid-an niya kun unsay buhaton sa duha didto sa gawas. Mora’g nanghugot ang iyang kaugatan dihang iyang nakita nga migakos si Evan sa hawak ni Liz. Napahit niya ang iyang wait sa tumang kalagot dihang nag-goodbye kiss sila si Evan ug Liz.

“Shit!” Tuaw niya sa hilom. -- Sumpayan pa