Ang Impiyerno ni Belen - 2

Hingpit kong nagpaulipon pagbalik sa kahuyang ug kahangol sa lawasnong kalipay. Nakakat-on ko sa pagpamakak ngadto sa akong mga ginikanan, aron lang makalusot ko sa pagpakigtagbo kang Homer. Nakamatikod ko nga mora’g nagduda na sila si Papa ug Mama sa akong mga lihok apan nag-amping gyud ko’g maayo nga dili nila hisakpan.

Usa ka higayon niana, gidala ko ni Homer sa usa ka matahom nga beach resort sa isla sa Pangangan, sakop sa lungsod sa Calape sa lalawigan sa Bohol. Bibo ang isla niadtong tungora sanglit nagsingabot ang ilang pagsaulog sa tinuig nilang kapistahan.

Mikuha mi’g cottage sa maong beach resort. Serado ang cottage ug kompleto sa amenities. Didto gigugol namo ang mga takna pagtagay sa lawasnong kalipay sa tuyo nga matagbaw ug matambalan sa hingpit ang tagsa-tagsa namo ka panginahanglan.

Mora mi’g bag-ong gikasal nga nag-honeymoon didto sa Pangangan. Tungod kay layo na man mi sa among dapit, wala mi mabalaka nga may mga kaila kami nga makakita namo nga nag-uban. Mao nga kompiyansa kaayo mi nga nagpasaya-saya sa pagpanan-aw sa nagkadaiyang mga kalingawan, nga gipahigayon sa Pangangan.

Tulo ka adlaw ming miistar sa cottage sa usa ka beach resort sa Pangangan. Tulo ka adlaw nga wala mi laing gihimo gawas sa paglulinghayaw ug inigbalik namo sa cottage, magtagbaw mi pagsalo sa lawasnong kalipay. Human sa tulo ka adlaw, namauli na kami ngadto sa Mabini. -- Sumpayan pa