Dili makahimo paghubo sa sotana

Udto. Mao pay pagkahuman namo sa paniudto. Misulod ko sa akong lawak aron mopahulay. Pero mao pa gani akong paghigda sa kama, may nanuktok sa pultahan sa lawak. Mibangon ko ug giablihan ang pultahan. Si Aubrey diay ang diha sa gawas sa pultahan.

"Puyde bang mosulod?" niya pa.

Nakalitan ko.Pero tungod sa akong kaikog ug kabalaka nga basin malain siya, mitando ko. Misulod siya sa lawak.

"Unsay imong tuyo?" gisukot ko siya.

Wala siya motingog. Gitangtang hinuon niya ang tanang salimbong sa iyang lawas sa akong atubangan human niya ma-lock ang seradora sa pultahan. Mibantang sa akong mga mata ang makabibihag niyang katahom.

"U-unsay buot ipasabot niini?" Nakapangutana ko nga daw wala sa kaugalingon.

"Gihigugma ko ikaw," matud ni Aubrey. "Itugyan ko kanimo ang akong lawas niining higayona."

"Dili mahimo,"matud ko.

"Ug nganong dili man?" niya pa. "Lalaki ka. Nasayod kong makahimo ka sa buot kong mahitabo tali kanatong duha."

"Dakong sala ang gusto mong mahitabo," mipasabot ko. "Dili ko makahimo sa paglapas sa balaod sa...."

"Ingna lang hinuon nga bayot ka," niya pa nga daw mihagit gayod kanako.

"Bahala na’g unsay imong ikasulti," nako pa. "Basta kay dili ko."

Ug gipugos ko siya sa paggawas sa akong lawak. Migawas man tuod siya apan nagkusmod ang dagway. Supak sa iyang kabubut-on ang akong pagbalibad sa gitanyag niyang lawasnong kalipay.

Gipakaingon ko’g nakalingkawas na ako sa problema kang Aubrey. Pero nasayop diay ko. Kay sa pagkasunod nga udto, samtang naghayang-hayang ko sa ibabaw sa mahunol-hunol nga kama sulod sa akong lawak, nanuktok na usab siya. Sa akong pag-abli sa pultahan, midiretso siya’g sulod nga walay pupananghid.

"Unsa man sab kining imong gihimo?" nangutana ko.

"Gusto kong angkonon mo ang akong pagka babye," matud ni Aubrey dayong tangtang sa iyang mga sapot sa akong atubangan.

"Giingnan ko na ikaw nga dili ako makahimo niana," matud ko. "Ug nasayod ka na sa hinungdan."

"Pero gihigugma ko ikaw," niya pa.

"Dakong sala kanang maong gugma," giingnan ko siya. "May nanag-iya na sa akong gugma. Busa ayaw pagpakabuang."

"Kun mao kana," ni Aubrey pa. "Dili mo na ako makita hangtod sa hangtod."

Dayon migawas siya sa akong lawak.

Nahibilin ako sa sulod sa lawak nga naghinuktok. Akong gihunahuna ang iyang gisulti sa dayon na niyang gawas sa akong lawak.

Sayo kaming nanihapon. Wala motambong si Aubrey. Gipasugoan ko siya ni Damiano sa iyang lawak. Abtik nga mituman si Damiano sa akong gisugo. Apan wala madugay, nahibalik si Damiano nga naghangos. Daw may gikalisangan.

"Ngano, Damiano?" Gipangutana ko siya."Unsay nahitabo?"

"Si Aubrey," niya pa nga daw gikutasan.

"Naghikog."

"U-unsa?" Nakugang ko.

"Nakaplagan ko siya nga nagbitay sulod sa iyang lawak," ni Damiano pa. "May higot nga pisi ang iyang liog."

Wala ko makasabot sa akong gibati. Daw gusto kong magmahay sa akong pagdumili sa buot mahitabo ni Aubrey tali kanamong duha. Nasayod ko nga kini ang hinungdan sa iyang paghikog. Dili siya makadawat sa akong pagbalibad kaniya.

Pero dili mahimong magpadaog ko sa tentasyon. Mas bug-at sa akong kasingkasing ang pag-alagad sa katawhan sa akong parokya kay sa pagpundar og kaugalingong pamilya -- kay gihalad ko na sa Dios ang akong kinabuhi.

Dili ako makahimo paghubo sa akong sotana. (Kataposan)